АНУ Венесуэлийн ерөнхийлөгч Николас Мадуро болон түүний эхнэр Силия Флорес нарыг баривчилсан гэх мэдээлэл олон улсын анхаарлын төвд ороод байна. АНУ Мадурог хар тамхины наймаа, террорист бүлэглэлүүдтэй хамтран ажилласан гэж буруутгаж, 2020 онд түүнийг авлига, хар тамхи, бусад гэмт хэрэгт яллагдагчаар татан, баривчлахад нь тус хүргэх мэдээлэлд 50 сая ам.долларын шагнал зарлаж байсан. Гэвч өнөөдөр болсон үйл явдал нь АНУ-ын зүгээс Латин Америкийн улсад цэргийн хүч хэрэглэн, тухайн улсын удирдагчийг баривчилсан анхны тохиолдол биш юм.
36 жилийн өмнө буюу 1989 онд АНУ Панам руу довтолж, тус улсын ерөнхийлөгч Мануэль Нориегаг баривчилж байв. Нориега анх АНУ-ын Тагнуулын төв газартай нягт хамтран ажиллаж, Төв Америкт коммунизмыг хязгаарлахад чухал холбоотон байлаа. Гэвч тэрээр Колумбын хар тамхины томоохон наймаачид, тэр дундаа Пабло Эскобартой хамтран кокаин АНУ руу нэвтрүүлэх, мөнгө угаах ажиллагаанд оролцож эхэлснээр түүний болон АНУ-ын хоорондын харилцаа нь хурцадсан юм. Эцэст нь АНУ-ын шүүх түүнийг хар тамхины хэргээр яллагдагчаар 1988 онд татсан байна.
1989 оны арванхоёрдугаар сард АНУ-ын ерөнхийлөгч Жорж Х. В. Буш “Шударга хэрэг” ажиллагааг эхлүүлж, 26 мянган цэрэг Панамд оруулсан бөгөөд Панамын зэвсэгт хүчнийг богино хугацаанд бут ниргэсэн ч Нориега оргон зайлж, Ватиканы элчин сайдын яаманд хоргоджээ. АНУ дипломат протокол зөрчихгүйгээр түүнийг буулгаж авахын тулд сэтгэлзүйн дайралт хийж, элчин сайдын яамны гадна чанга яригч байрлуулан рок, метал дууг тасралтгүй эгшиглүүлсэн нь түүхэнд үлдсэн байдаг. Эцэст нь Нориега 1990 оны нэгдүгээр сарын 3-нд бууж өгч, Майами руу шилжүүлэгдэн, хар тамхины хэргээр ял авч, АНУ-ын шоронд бараг 20 жил хоригдсон.
Өнөөдрийн Николас Мадурогийн хэрэг явдал нь Мануэль Нориегагийн түүхтэй олон талаараа адилхан харагдаж байна. АНУ өмнө нь холбоотон гэж үзэж байсан удирдагчдаа хар тамхи, хууль бус ажиллагааны нэрээр баривчилж байсан түүх ийнхүү давтагдаж, Латин Америк дахь АНУ-ын оролцоо, хүч хэрэглэсэн бодлогын талаар дахин маргаан өрнүүлэх шалтгаан болж байна.
Эх сурвалж: CBS News
