АНУ-ын ерөнхийлөгч Дональд Трамп Венесуэлд явуулсан цэргийн ажиллагааг “онцгой”, “гайхамшигтай довтолгоо” хэмээн тодорхойлж, Америкийн цэргийн хүч чадлыг урьд өмнө байгаагүй хэмжээнд харуулсан үйл ажиллагаа боллоо гэж мэдэгдэв.

Тэрбээр өнөөдөр хийсэн хэвлэлийн бага хурал дээр АНУ-ын зэвсэгт хүчин агаар, газар, тэнгисээр зэрэг довтолсон бөгөөд нэг ч америк цэрэг амь үрэгдээгүй, ямар ч техник хэрэгсэл алдагдаагүй гэдгийг онцолсон юм.

Трампын хэлснээр уг ажиллагааны гол зорилго болох Венесуэлийн удирдагч Николас Мадуро болон түүний эхнэрийг баривчлах ажиллагаа бүрэн амжилттай хэрэгжсэн байна.

Трамп Венесуэлийн цэргүүд бэлтгэлтэй байсан ч маш хурдан хугацаанд бүрэн дарагдсан гэж мэдэгдэж, Каракасын цахилгааныг тасалсан нь АНУ-ын онцгой ур чадварын илрэл хэмээн тайлбарлав. Тэрбээр Николас Мадурог АНУ руу асар их хэмжээний хар тамхи оруулсан гэмт хэрэгт буруутгаж, түүнийг хууль бус дарангуйлагч гэж нэрлэсэн бөгөөд Мадуро болон түүний эхнэр одоо Америкийн шүүхийн өмнө хариуцлага хүлээнэ гэж мэдэгдсэн юм.

Хамгийн их анхаарал татсан мэдэгдэл нь Трамп АНУ Венесуэлийг аюулгүй, зохистой, шударга шилжилт хийгдэх хүртэл түр удирдана гэж ил тод хэлсэн явдал байв. Тэрбээр АНУ-тай хамтран ажилласнаар Венесуэлийн ард түмэн чинээлэг, бие даасан, аюулгүй болно гэж амлаж, шаардлагатай тохиолдолд Венесуэлийн эсрэг илүү том хэмжээний хоёр дахь цохилт өгөхөд бэлэн байгаагаа ч илэрхийлсэн. Мөн Америкийн томоохон компаниуд тус улсын газрын тосны дэд бүтцийг сэргээж, эдийн засгийг сэргээнэ гэж мэдэгдэв.

Шинжээчдийн үзэж байгаагаар эдгээр үгс нь Венесуэлийн ирээдүйг АНУ өөр дээрээ бүрэн авснаа зарласан хэрэг юм. Өмнө нь Иракийн дайныг эрс шүүмжилж байсан Трамп одоо өөрөө улс орныг дахин байгуулах бодит байдалтай нүүр тулж байна. Венесуэлийн хувь заяа одоо АНУ-ын гарт орлоо.

Эх сурвалж: BBC