Нигерийн хойд хэсэгт байрлах Нигер мужийн нэгэн тосгонд зэвсэгт этгээдүүд халдлага үйлдэж, дор хаяж 30 хүний амь насыг хөнөөн, хэд хэдэн иргэнийг барьцаалсан талаар тус улсын цагдаагийн байгууллага ням гарагт мэдээллээ.

Энэхүү халдлага нь олон жил үргэлжилж буй зэвсэгт мөргөлдөөн, хүчирхийллийн давтамж өндөртэй бүс нутагт гарсан ээлжит эмгэнэлт явдал боллоо.

Цагдаагийн байгууллагын мэдэгдсэнээр, зэвсэгт этгээдүүд бямба гарагийн орой Боргу орон нутгийн захиргаанд харьяалагдах Касуан-Дажи тосгон руу дайран орж, оршин суугчид руу гал нээсэн байна. Тэд мөн тосгоны зах болон хэд хэдэн байшинг шатаасан гэж Нигер мужийн цагдаагийн хэвлэлийн төлөөлөгч Васиу Абиодун онцолжээ. Харин амиа алдсан хүний тоо 37-оос давсан байж болзошгүй бөгөөд ням гарагт хүртэл зарим хүмүүс сураггүй хэвээр байсан гэж мэдээлсэн байна. Мөн халдлага болсноос хойш аюулгүй байдлын хүчнүүд ирээгүй байгаа нь цагдаагийн эрэн хайх ажиллагаа эхэлсэн гэх мэдэгдэлтэй зөрчилдөж буйг иргэд хэлжээ.

Католик сүмийн хэвлэлийн төлөөлөгч Стивен Кабиратыг орон нутгийн хэвлэлд өгсөн ярилцлагадаа, халдлагын үеэр 40-өөс дээш хүн амиа алдсан бөгөөд барьцаалагдсан хүмүүсийн дунд хүүхдүүд багтсан гэж мэдэгдсэн байна. Нэрээ нууцлахыг хүссэн нэгэн оршин суугчийн хэлснээр, халдлага үйлдэгчид довтлохоосоо өмнө ойролцоох суурин газруудад долоо хоног орчим тэнүүчилж байжээ. Түүний хэлснээр халдлага гурван цаг орчим үргэлжилжээ.

Ийм төрлийн халдлага Нигерт түгээмэл бөгөөд аюулгүй байдал сул, төрийн оролцоо багатай алслагдсан бүс нутгуудад зэвсэгт бүлэглэлүүд нөлөөгөө тогтоохын тулд энгийн иргэдийг онилдог байна. Касуан-Дажи тосгоны халдлага нь өнгөрсөн арваннэгдүгээр сард Папири сууринд 300 гаруй сурагч, багш нарыг католик сургуулиас нь барьцаалсан хэрэг гарсан бүсийн ойролцоо болсон юм. Цагдаагийн мэдээлснээр, халдагчид Кабе дүүргийн зүгт орших ойгоос ирсэн бөгөөд эзэнгүй, өргөн уудам ой модод зэвсэгт бүлэглэлүүдийн нуугдах орогнох газар болсоор байгааг дахин харууллаа.

Эх сурвалж: CNN