АНУ-ын ерөнхийлөгч Дональд Трампын хамгийн нөлөө бүхий зөвлөхүүдийн нэг Стивен Миллер Гренландын ирээдүйн төлөө АНУ-тай хэн ч дайтна гэж байхгүй хэмээн мэдэгдлээ.
Тэрбээр CNN-д өгсөн ярилцлагадаа Грийнландыг АНУ-ын бүрэлдэхүүнд оруулах нь НАТО болон Арктикийн аюулгүй байдлыг хангах стратегийн шаардлагатай гэж тайлбарласан бөгөөд “АНУ-ын засгийн газрын албан ёсны байр суурь бол Грийнланд АНУ-ын нэг хэсэг байх ёстой” хэмээн онцолсон юм. Миллер мөн Данийн Грийнландыг захирах эрхийн үндсийг эргэлзээтэй гэж үзэж, “Дани ямар эрхээр Грийнландыг өөрийн колони гэж үзэжбайна вэ?” гэж асуусан байна.
Ням гарагт Дональд Трамп АНУ Грийнландыг “үндэсний аюулгүй байдлын үүднээс зайлшгүй эрхэндээ оруулах хэрэгтэй” хэмээн дахин мэдэгдсэн нь Данийн ерөнхий сайд Метте Фредериксенийг ихээхэн бухимдуулжээ.
Тэрбээр АНУ Данид халдвал НАТО задрахад хүрнэ гэж анхааруулсан байна. Үүний хариуд Их Британи, Франц, Герман, Итали, Польш, Испани болон Дани зэрэг Европын долоон улс хамтарсан мэдэгдэл гаргаж, “Грийнланд бол Грийнландын ард түмнийх бөгөөд зөвхөн Дани, Грийнланд хоёр уг бүс нутгийн ирээдүйг шийдэх эрхтэй” хэмээн мэдэгдсэн юм. Тэд Арктикийн аюулгүй байдал чухал гэдгийг хүлээн зөвшөөрсөн ч НҮБ-ын дүрэм, тусгаар тогтнол, нутаг дэвсгэрийн бүрэн бүтэн байдлыг хүндэтгэх ёстойг онцолжээ.
Грийнландын асуудал АНУ Венесуэльд цэргийн ажиллагаа явуулж, тус улсын ерөнхийлөгч Николас Мадурог баривчилсны дараа дахин хурцаар тавигдаж эхэлсэн байна. Уг ажиллагааны дараа Трамп АНУ Венесуэлийг тодорхой хугацаанд удирдана гэж мэдэгдсэн. Үүний дараахан Стивен Миллерийн эхнэр Кэти Миллер АНУ-ын далбааны өнгөөр будсан Грийнландын газрын зургийг “ТУН УДАХГҮЙ” гэсэн бичвэртэйгээр сошиал сүлжээнд нийтэлсэн нь олон нийтийн санааг ихэд түгшээсэн байна.
57 мянган хүн амтай Грийнланд нь 1979 оноос хойш өргөн хүрээний өөртөө засах эрхтэй ч батлан хамгаалах, гадаад бодлого нь Данийн мэдэлд хэвээр байгаа юм. Хэдийгээр Грийнландын иргэдийн ихэнх нь ирээдүйд Дани улсаас бүрэн тусгаар тогтнохыг дэмждэг ч олон нийтийн санал асуулгаар АНУ-ын бүрэлдэхүүнд орохыг эрс эсэргүүцэж байгаа нь тодорхой байна.
Эх сурвалж: BBC
