Швейцарийн Кранс-Монтана амралтын бүсэд байрлах Le Constellation нэртэй цанын уушийн газарт гарсан аймшигт гал түймрийн дараа уг газар таван жилийн турш аюулгүй байдлын шалгалтад хамрагдаагүй байсан нь ил болжээ.

Хотын дарга Николя Феро мягмар гарагт хийсэн хэвлэлийн бага хурал дээр тухайн баар яагаад 2019 оноос хойш шалгагдаагүйг тайлбарлаж чадахгүй байгаагаа хүлээн зөвшөөрч, хотын захиргаа гүнээ харамсаж, хариуцлага хүлээнэ гэж мэдэгдсэн байна. Дүрмийн дагуу ийм төрлийн газрууд жил бүр шалгагдах ёстой байжээ.

Уг гал түймэр нь шинэ жилийн шөнө гарч, 40 хүн амь үрэгдэж, 116 хүн түлэгдэж гэмтсэн юм. Урьдчилсан мэдээллээр, оч цацруулагч таазанд хэт ойр өргөгдсөнөөс гал гарсан байж болзошгүй бөгөөд үүнтэй холбогдуулан орон нутгийн бүх нийтийн газруудад оч цацруулагч хэрэглэхийг бүрэн хориглохоор болсон байна. Мөн хотын захиргаа бүс нутгийн 128 үйлчилгээний газарт гаднын мэргэжлийн байгууллагаар иж бүрэн шалгалт, аудит хийлгэхээр шийджээ.

Прокурорын байгууллага Le Constellation уушийн газрын хоёр менежерийг эрүүгийн хэрэгт татсан бөгөөд тэднийг хайхрамжгүй үйлдлээс үүдсэн хүний амь нас хохироосон, бие махбодын гэмтэл учруулсан, мөн гал түймэр дэгдээсэн байж болзошгүй хэмээн сэжиглэж байна. Хотын дарга Феро уг газарт дуу тусгаарлагч материалыг таазанд ашигласан, мөн оч цацруулагч зөвшөөрсөн нь туйлын хариуцлагагүй үйлдэл байсан гэж онцолжээ. Харин ослоос өмнө сошиал сүлжээнд нийтлэгдсэн, таазны ойролцоо оч цацруулагч ашиглаж буй зургуудын талаар асуухад, хотын захиргааны хэн ч тэдгээрийг хараагүй байх магадлалтай гэж тайлбарласан байна.

Эх сурвалж: BBC