Филиппиний төв хэсэгт орших Себу хотод байрлах Биналив хогийн цэгт гарсан нурангитай холбоотойгоор амиа алдагсдын тоо 11-д хүрсэн талаар эрх баригчид мэдэгдлээ. Өнгөрсөн долоо хоногт болсон уг ослын үеэр тус газарт 100 гаруй ажилтан ажиллаж байсан бөгөөд аврагчид одоогийн байдлаар 12 хүнийг хүнд гэмтсэн байдалтайгаар гаргаж чадсан ч 20-оос дээш хүн сураггүй хэвээр байна. Орон нутгийн гал түймрийн албаны нэгэн ажилтан ослоос хойш гурван хоногийн дараа “амьд хүн үлдсэн байх магадлал маш бага” гэж өмнө нь мэдэгдэж байв.

Гэсэн ч даваа гарагт нурангинаас амьд хүний шинж тэмдэг илэрсэн талаар Себу хотын захирагч Нестор Арчивал GMA News-д өгсөн ярилцлагадаа хэлж, аврах ажиллагаа үргэлжилж байгааг онцолжээ. Хогийн цэг нурсны шалтгааныг мөрдөн шалгах, улмаар улсын хог хаягдлын менежментийн тогтолцоог бүхэлд нь дахин үнэлэх шаардлагатай гэсэн уриалгыг энэхүү осол дагуулж байна. Байгаль орчны байгууллагууд хогийн цэгийг ажиллуулдаг Прайм Интегрэйтед Уэйст Солюшнс компанийн үйл ажиллагааг түр зогсоож, 90 хоногийн дотор шаардлага хангах төлөвлөгөө ирүүлэхийг үүрэг болгожээ.

Ослын дараа олон хууль тогтоогчид хог хаягдлын салбар дахь хөдөлмөрийн нөхцөл, аюулгүй байдлыг дахин хянахыг шаардаж байна. Сенатор Имээ Маркос “Ийм эмгэнэлт явдал огт болох ёсгүй байсан. Өмнө нь ижил төстэй ослууд гарч байсан ч ямар ч ахиц дэвшил гараагүй байна” хэмээн мэдэгдэж, бодит шинэчлэл хийхийг уриалжээ. Эхнэрээ ослын үеэр алдсан орон нутгийн иргэн Биенвинидо Ранидо “хог дэлбэрэх шиг болж, барилга бүхэлдээ хогонд дарагдсан” гэж дурссан байна. Урьдчилсан тайлангаар сүүлийн долоо хоногуудад үргэлжилсэн их хэмжээний бороо хогийг улам хүнд болгож, инженерийн бусад хүчин зүйлтэй хавсарснаар нуранги үүссэн байж болзошгүй гэж үзэж байна.

Эх сурвалж: BBC