Өмнөд Солонгосын ерөнхийлөгч асан Юн Сок Ёль-д холбогдох хэрэгт прокурорууд цаазын ял оноохыг шүүхээс хүсээд байна. Сөүл хотын төв дүүргийн шүүхэд болсон шүүх хурлын төгсгөлийн хэлэлцүүлгийн үеэр түүнийг 2024 оны арванхоёрдугаар сард цэргийн онц байдал тогтоохыг оролдсон, өөрөөр хэлбэл “төрийн эргэлт зохион байгуулсан гол удирдагч” хэмээн буруутгав. Хэдхэн цаг үргэлжилсэн уг төрийн эргэлт хийх гэсэн оролдлого нь улс орныг улс төрийн гүн хямралд оруулж, улмаар Юн парламентын шийдвэрээр огцорч, баривчлагдан шүүхийн өмнө очоод байгаа юм.

Прокуроруудын тайлбарласнаар, бослого удирдсан гэх энэ хэрэг нь Өмнөд Солонгосын хуулиар хамгийн хүнд гэмт хэрэгт тооцогдож, цаазын ял эсвэл бүх насаар нь хорих ял оноох боломжтой. Тэд Юныг “урт хугацаанд засаглах, дарангуйлал тогтоох гэсэн эрх мэдлийн шуналд автсан” гэж үзэж, хүний амь хохироогүй ч түүний зорилго нь хүчирхийлэлд тулгуурласан байсан хэмээн онцоллоо. “Энэ хэрэгт хамгийн их хохирсон нь Өмнөд Солонгосын ард түмэн” гэж прокурорууд шүүхэд мэдэгдсэн байна.

Юн Сок Ёль өөрийгөө буруугүй хэмээн мэдэгдэж, ерөнхийлөгчийн хувьд онц байдал зарлах бүрэн эрхтэй байсан, үүнийг сөрөг хүчний буруу үйлдлүүдэд олон нийтийн анхаарлыг хандуулах алхам байсан гэж тайлбарлажээ. Гэсэн ч шүүхэд цэргийн командлагч нарын мэдүүлэг, мөн онц байдлыг төлөвлөсөн хүмүүсийн бичиг баримтуудыг нотлох баримтаар танилцуулсан бөгөөд тэдгээрт улс төрчид, сэтгүүлчид, хөдөлмөрийн идэвхтнүүдийг устгах тухай ч дурдсан байсан нь олон нийтийг цочроогоод байна.

Өмнөд Солонгост сүүлийн 30 орчим жилд цаазын ял гүйцэтгээгүй байгаа бөгөөд прокуроруудын ийм шаардлага нь хэргийн ноцтой байдлыг харуулж байна. Шүүхийн эцсийн шийдвэрийг хоёрдугаар сард гаргах төлөвтэй бөгөөд прокуроруудын нэхэмжилсэн ял заавал батлагдана гэсэн үг биш юм. Юн Сок Ёль ийнхүү Өмнөд Солонгосын түүхэнд албан тушаалтайгаа байхдаа баривчлагдаж, хамгийн хүнд ял сонсох эрсдэлтэй тулгарсан анхны ерөнхийлөгч болоод байна.

Эх сурвалж: BBC