АНУ-ын Ерөнхийлөгч Доналд Трамп Грийнландыг АНУ-д нэгтгэх санаархлыг нь эсэргүүцсэн улс орнуудад гаалийн тариф ногдуулах боломжтой гэж мэдэгдлээ. Тэрбээр Цагаан ордонд болсон уулзалтын үеэр Грийнланд нь Дани улсын харьяанд өөртөө засах статустай нутаг дэвсгэр бөгөөд АНУ-ын үндэсний аюулгүй байдалд маш чухал холбогдолтой гэж онцолсон байна.

Гэхдээ ямар улсуудад, ямар хууль эрх зүйн үндэслэлээр тариф ногдуулахыг тодорхой хэлээгүй. Энэ мэдэгдэлтэй зэрэгцэн АНУ-ын Конгрессын хоёр намын төлөөлөгчид Грийнландад айлчилж, тус нутгийн байр суурийг сонсож, хурцадмал байдлыг намжаах зорилготой байгаагаа илэрхийлжээ.

Уг төлөөлөгчдийн бүрэлдэхүүнд Бүгд Найрамдах болон Ардчилсан намын гишүүд багтсан бөгөөд тэд Дани улсын Ерөнхий сайд Метте Фредериксен, Грийнландын Ерөнхий сайд Йенс-Фредерик Нильсен нартай уулзсан байна. Бүлгийн ахлагч, сенатор Крис Кунс айлчлалын зорилгыг “орон нутгийн иргэдийн дуу хоолойг сонсож, Вашингтонд хүргэх” хэмээн тайлбарласан бол Грийнландын парламентын гишүүн Аая Хемниц АНУ-ын хууль тогтоогчидтой хийсэн уулзалт түүнд найдвар төрүүлсэн гэж BBC-д ярьжээ. Тэрбээр АНУ-ын зүгээс ирж буй дарамт 2019 оноос хойш тасралтгүй үргэлжилж буйг онцолж, нөхцөл байдал цаг тутамд өөрчлөгдөж байгааг дурдсан байна.

Грийнланд нь хүн ам цөөн ч байгалийн баялаг арвин, Хойд Америк ба Арктикийн хооронд стратегийн чухал байршилтай бөгөөд АНУ аль хэдийн Питуффик дахь пуужин хянах баазад 100 гаруй цэргээ байршуулаад байгаа.

Доналд Трамп Гренландыг өөрсдийн мэдэлд оруулахгүйгээр бүрэн хамгаалж чадахгүй гэж үзэж байгаа бол Дани улсын зүгээс цэргийн ямар нэгэн арга хэмжээ авсан үйлдэл нь НАТО-гийн цаашид оршин тогтнох эсэхэд маш том заналхийлэл болно хэмээн анхааруулжээ. Үүний зэрэгцээ Франц, Герман, Швед, Норвеги, Финлянд, Нидерланд, Их Британи зэрэг Европын орнууд Грийнландад хамтарсан тагнуул-судалгааны шинжтэй цэргийн баг бүрэлдэхүүн илгээж, Арктикийн аюулгүй байдал нь НАТО-гийн хамтын хариуцлага байх ёстойг онцолсон байна.

Эх сурвалж: BBC