Шинэ Зеландын Хойд аралд үргэлжилсэн их хэмжээний аадар борооны улмаас үүссэн хөрсний нуралт болон үерийн гамшиг олон газарт ноцтой хохирол учруулаад байна. Хелина Бей орчимд болсон томоохон хөрсний нуралтаас болж нутгийн гол зам хаагдаж, хэдэн зуун хүн гадаад ертөнцөөс тусгаарлагдсан байдалд оржээ.

Оакура, Тил Бэй, Блэнд Бэй, Мōкау, Нгайотонга, Уангарару зэрэг суурин газрууд руу чиглэсэн замд нарс мод, их хэмжээний шороо, ойролцоогоор 100 тонн жинтэй аварга чулуу нуран унасан тухай Шинэ Зеландын хэвлэлүүд мэдээлсэн байна.

Үүнтэй зэрэгцэн Маунгануй уулан дахь аялал жуулчлалын кемпийн бүсэд үүссэн хөрсний нуралтаас болж хэд хэдэн хүн сураггүй алга болсон бөгөөд аврагчид эрэн хайх ажиллагаа явуулж байна. Албаныхны мэдээлснээр амьд хүн байгаа шинж тэмдэг одоогоор илрээгүй ч нурангийг болгоомжтой цэвэрлэн, бүх боломжит хувилбарыг шалгаж байгаа аж. Онцгой байдлын сайд Марк Митчелл “гэр бүлүүдийн зовлон шаналлыг бид бүрэн ойлгож байна” хэмээн мэдэгдэж, зарим бүс нутгийн байдал “дайны талбар шиг” байгааг онцолсон юм.

Сүүлийн жилүүдэд Хойд аралд хүчтэй бороо, үер, хөрсний нуралтын давтамж эрс нэмэгдсэнийг мэргэжилтнүүд анхааруулж байна. 2023 оны Габрьелла хар салхины дараах сэргээн босголт бүрэн дуусаагүй байхад ийнхүү дахин их хэмжээний гамшиг нүүрлэсэн нь орон нутгийн иргэдэд эдийн засаг, сэтгэлзүйн асар том дарамт болжээ. Одоогоор хэдэн мянган айл өрх цахилгаангүй хэвээр байгаа бөгөөд засгийн газар болон орон нутгийн захиргаад нөхцөл байдлыг тогтворжуулах, зам харилцаа, дэд бүтцийг сэргээхэд бүх хүчээ дайчилж байна.

Эх сурвалж: BBC