Өнгөрсөн ням гарагт АНУ-ын Миннеаполис хотод Гааль, хил хамгаалах албаны холбооны цагаачлалын ажилтнуудын оролцсон буудлагын улмаас нэг хүн нас барсан ноцтой хэрэг гарлаа. Тэд энэ сарын эхээр мөн өөр нэг 37 настай Рене Николь Гуд гэх эмэгтэйг буудан хөнөөсөн. Үүнийгээ тэд аргагүй биеэ хамгаалалт гэж тайлбарлаад байгаа юм. 

Уг хэргийн хохирогч нь 37 настай Алекс Претти гэх эр бөгөөд түүнийг буудан хөнөөсөн байна. Хэрэг гарсны дараа Миннеаполис хотод олон нийт цугларч, холбооны цагаачлалын албаны хэрэгжилтийг эсэргүүцэн жагсаал өрнүүлж байгаа юм. Миннесота мужийн захирагч Тим Уолз Ерөнхийлөгч Трампыг холбооны агентуудыг мужаас нь татахыг дахин уриалж, "Энэ бол эргэлтийн цэг, Америк" гэж мэдэгдэв.

АНУ-ын Ерөнхийлөгч Доналд Трамп ням гарагт "Wall Street Journal" сонинд өгсөн ярилцлагадаа Миннеаполис мужийн цагаачлалын албан тушаалтнуудыг эргүүлэн татахад бэлэн байгаагаа илэрхийлээд, "Бид хэзээ нэгэн цагт явах болно. Бид явсан, тэд гайхалтай ажил хийсэн" гэжээ.

Тэрбээр энэ хэзээ болохыг тодорхойлоогүй байна. Трамп мөн ярилцлагадаа түүний засаг захиргаа Миннеаполист болсон Алекс Преттигийн үхлийн талаарх "бүх зүйлийг хянаж" байгаа "удахгүй илчлэх болно" гэж мэдэгджээ.

Алекс Преттигийн 2011 онд төгссөн Миннесотагийн Их Сургууль түүний үхлийн талаар мэдэгдэл гаргаж, үүнийг "манай нийгэмд маш их зовлонтой үе" гэж тодорхойлжээ. Уг мэдэгдэлд "Тэрээр халамж, энэрэнгүй сэтгэлтэй нэгэн байсан. Тэр нийгэмд үйлчилж байсан сайн ажилтан. Бид Алексийн гэр бүл, хайртай хүмүүс болон түүний үхэлд гашуудаж буй бүх хүмүүст гүн эмгэнэл илэрхийлж байна. Бие биедээ анхаарал халамж тавихыг уриалж байна" гэжээ. 

Л.Баяр