АНУ-ын олон бүс нутгийг хамарсан хүчтэй цасан шуурганы улмаас дор хаяж 14 хүн амь насаа алдсан бөгөөд хэдэн зуун мянган айл өрх цахилгаангүй болжээ.

Цаг агаарын энэ аюулт үзэгдэл нь Нью-Йорк, Теннесси, Луизиана, Массачусетс, Канзас, Техас зэрэг мужуудад хүний амь эрсдэхэд хүргэсэн байна.

Техаст чаргаар гулгаж байсан 16 настай охин ослоор амиа алдсан тухай мэдээлсэн бол бусад мужуудад осол, даарч хөрөх, цас цэвэрлэх техникд мөргүүлэх зэрэг шалтгаанаар нас баралт бүртгэгджээ. Нью-Йорк хотын захирагч нас баралтын тоо цаашид нэмэгдэх магадлалтай ч яг шалтгааныг тогтоох эрт байна хэмээн мэдэгдсэн байна.

Хүчтэй цас, мөстөлт, хэт хүйтэн температурын улмаас АНУ даяар мянга мянган нислэг цуцлагдсан байна. FlightAware сайтын мэдээлснээр зөвхөн өнөөдөр 3,600 гаруй нислэг цуцлагдсан бөгөөд амралтын өдрүүдээр нийт 15,000-аас давсан нислэг саатжээ. Сургуулиуд хаагдаж, олон мужид авто замуудыг бүрэн болон хэсэгчлэн хаасан байна. Үндэсний Цаг уурын алба (NWS)-аас гаргасан анхааруулга Техасаас эхлэн зүүн хойд бүсийн Нью-Ингланд хүртэл хамарч, “онц аюултай хүйтэн” болон цасан шуурганы сэрэмжлүүлэг өргөн хүрээнд хүчин төгөлдөр үйлчилж байна.

Одоогийн байдлаар 800,000 гаруй хүн цахилгаангүй байгаа бөгөөд Теннесси муж уг гамшигт хамгийн их өртөж, ойролцоогоор 250,000 хэрэглэгч тоггүй болсон байна. Миссисиппи, Луизиана зэрэг мужуудад ч мөн адил олон зуун мянган айл цахилгаангүй хэвээр байна. Энэхүү шуурга Канадын зарим бүсэд ч ноцтой нөлөөлжээ. Торонто хотын нисэх онгоцны буудалд ням гарагт 46 см цас орсон нь түүхэн дэх нэг өдрийн хамгийн их цас орсон үзүүлэлт болсон байна. Ингэснээр тус нисэх буудалд 1937 оноос хойших хамгийн их цастай нэгдүгээр сар болжээ.

АНУ-ын 23 муж болон Вашингтон хот онц байдал зарласан бөгөөд эрх баригчид иргэдийг шаардлагагүй тохиолдолд замд гарахгүй байх, зайлшгүй зорчих бол маш болгоомжтой, удаан явахыг анхааруулж байна. Албаныхан цаг агаарын нөхцөл ойрын өдрүүдэд хэвийн болох төлөвгүй байгаа тул аврах, сэргээн засварлах ажиллагаа үргэлжилсээр байхыг мэдэгдээд байна.

Эх сурвалж: BBC