Венесуэлийн түр ерөнхийлөгч Делси Родригес АНУ-ын Венесуэльд тавьж буй дарамт хэрээс хэтэрч буйг олон нийтэд илэрхийллээ. Тэрбээр Пуэрто-ла-Крус хотод нефтийн салбарын ажилчдад хандан үг хэлэхдээ, Венесуэлийн дотоод улс төрийг гаднын хүч биш, венесуэльчүүд өөрсдөө шийдэх ёстойг онцлон мэдэгдсэн байна. Родригесийн энэхүү мэдэгдэл нь АНУ Венесуэлийн өмнөх удирдагч Николас Мадурог баривчилсны дараах улс төрийн тогтворгүй үед гарч буйгаараа онцлог юм.

АНУ-ын дэмжлэгтэйгээр түр удирдагчаар томилогдсон Родригес албан тушаалаа авснаас  хойш дотоодын Мадурод үнэнч бүлэглэлүүд болон Цагаан ордны хооронд тэнцвэрийг хадгалах шаардлагатай тулгарч ирсэн. Гэвч нефтийн олборлолтыг сэргээх, АНУ-тай онцгой түншлэл байгуулах зэрэг асуудлуудаар Вашингтоны шахалт нэмэгдсэн энэ үед тэр анх удаа ил тод байр суурь илэрхийлж, “Вашингтоны захирамж Венесуэлийн улс төрд хамаарах ёсгүй” хэмээн мэдэгджээ.

Николас Мадуро болон түүний эхнэр Силия Флорес нарыг 2026 оны нэгдүгээр сард баривчилж, Нью-Йорк хотод авчирснаас хойш АНУ Венесуэльд тогтмол дарамт үзүүлсээр ирсэн. АНУ-ын Ерөнхийлөгч Дональд Трамп эхэндээ Венесуэлийг АНУ “удирдана” гэж мэдэгдэж байсан ч Делси Родригесийг түр удирдагчаар дэмжсэн юм. Харин сүүлийн мэдэгдлээрээ Родригес АНУ Венесуэлийг захирдаггүй гэдгийг дахин сануулж, шууд сөргөлдөөнөөс зайлсхийсэн ч тусгаар тогтнолын байр сууриа тодорхой илэрхийллээ.

Газрын тосоор баялаг Венесуэл сүүлийн 25 жилийн турш АНУ-тай хурц харилцаатай ирсэн бөгөөд Мадурог огцруулсны дараа ч улс төрийн хуваагдал арилаагүй хэвээр байна. Одоогоор тус улс Мадурод үнэнч хүчин, зүүн жигүүрийн сөрөг хүчин, мөн Уго Чавесын үзлийг дэмждэг ч Мадурог эсэргүүцэгч бүлгүүдэд хуваагдсан байдалтай байгаа бөгөөд Делси Родригесийн мэдэгдэл энэ эмзэг тэнцвэрийг хадгалах гэсэн оролдлогын нэг хэсэг гэж ажиглагчид дүгнэж байна.

Эх сурвалж: CNN