Энэ долоо хоногт Өмнөд Солонгосын экс тэргүүн хатагтайн шүүх хурал болно. Тэрбээр Chanel цүнх, BMW дилер болон маргаантай сүмийн асуудлуудаар шүүхийн өмнө очлоо. Ерөнхийлөгч асан Юн Сок Ёлын эхнэр Ким Гын Хиг өнгөрсөн наймдугаар сард авлига, хувьцааны луйвар, улс төрийн оролцоо зэрэг хэд хэдэн хэрэгт буруутган баривчилсан бөгөөд тэрээр эдгээр бүх хэргийг үгүйсгэж байгаа. 

Кимийн нөхөрт цэргийн дэглэм тогтоох оролдлого хийсэнд нь эрх мэдлээ урвуулан ашиглаж, шударга ёсыг тогтооход саад учруулсан хэргээр таван жилийн хорих ял оноосоноос хойш хоёр долоо хоног өнгөрлөө. Харин түүний хэргийн шүүх анхны хурал өнөөдөх эхлэв. Прокуроруудын мэдээлснээр, 52 настай Ким 2010 оны 10-р сараас 2012 оны 12-р сарын хооронд Өмнөд Солонгосын BMW дилер болох Deutsch Motors компанийн хувьцааг хамарсан үнийн залилангийн схемд оролцож 800 сая вон  буюу 552,570 ам.долларын илүү орлого олсон байна.

Түүнийг мөн Нэгдлийн Сүмээс хахууль болгон тансаг цүнх, алмаазан зүүлт болон 80 сая хүртэлх воны үнэтэй бусад бэлэг авсан, мөн 2022 оны ерөнхийлөгчийн сонгуулийн өмнө улс төрийн зуучлагч Мён Тэ Кюнээс 270 сая воны үнэтэй 58 үнэгүй санал асуулга авсан хэмээн буруутгаж байгаа юм. Шүүх хурлыг олон нийтэд шууд дамжуулах ажээ. 

Тэргүүн хатагтай болохоосоо өмнө Ким жирийн бизнес эрхлэгч, урлагийн хорхойтон байжээ. Тэрбээр 1999 онд Сукмёнгийн эмэгтэйчүүдийн их сургуулийг урлагийн боловсролын чиглэлээр төгссөн боловч оюутан байхдаа хуулбарласан хэргээр удаа дараа буруутгагдаж, улмаар тус сургуулийн судалгааны ёс зүйн зөвлөл түүний дипломын ажлыг 2025 онд хүчингүй болгосон. Тэрбээр эдгээр буруутгалын талаар хэзээ ч олон нийтэд тайлбар хийгээгүй.

2009 онд тэр урлагийн үзэсгэлэнгийн Covana Contents компанийг үүсгэн байгуулж, одоо ч гүйцэтгэх захирал, ерөнхийлөгчөөр ажиллаж байгаа. 2019 онд Өмнөд Солонгосын хэвлэл мэдээллийн хэрэгслээр түүнийг татвараас зайлсхийж, урлагийн үзэсгэлэн зохион байгуулсныхаа төлөө мөнгөн шан харамж авсан гэж мэдээлсэн.

Нөхөр нь 2022 оны ерөнхийлөгчийн сонгуульд ялахын өмнө нь тэрбээр хуурамч намтар зохиосон хэргээр сөрөг хүчнийхнээс цохилт авсан. Үүнийг хүмүүс сөрөг хүчний явуулга гэж үзэж байсан ч Ким өөрийн намтар дээрх "хэтрүүлэг"-ийнхээ төлөө олон нийтээс уучлалт гуйжээ.

Гар цүнхний дуулиан

2023 оны сүүлээр тагнуулын камерын бичлэг задарч, уг бичлэгт 2022 оны 9-р сард Ким Сөүлийн нэгэн оффист хүнээс тансаг брэндийн цүнх авч байгааг харуулжээ. Энэхүү бичлэгийг пастор Чой Жэ Ён бугуйн цагандаа суулгасан камераар нууцаар бичиж авсан. Уг бичлэг задарснаар Ким, Юн хоёрын талаарх олон нийтийн бодол эрс өөр болсон гэж хэлж болно. 

Бичлэг Чой саарал цэнхэр өнгийн тугалын арьсан цүнх худалдаж авахаар дэлгүүр рүү алхаж байгааг харуулсан. Мөн баримт дээр нь үнийг нь 3 сая вон 2,200 ам.доллар гэж бичсэн байжээ. Дараа нь Чой тэргүүн хатагтайн эзэмшдэг Сөүл дэх Covana Contents компанид зочлоход хатагтай Ким пастораас "Та яагаад надад эдгээр зүйлсийг авчирч өгөөд байгаа юм бэ?" гэж асууж байгааг харуулна. 

Өмнөд Солонгосын хуулиар төрийн албан хаагчид болон тэдний эхнэр/нөхөр нэг дор 1 сая воноос дээш, эсвэл жилд нийт 3 сая воноос дээш үнэтэй бэлэг бусдаас авахыг хориглодог. Видео бичлэгт хатагтай Ким бэлгийг хүлээн авч байгааг тодорхой харуулаагүй ч "Korea Herald" сонинд тухайн үед Ерөнхийлөгчийн тамгын газар цүнхийг хүлээн авсан гэдгээ баталгаажуулж, "засгийн газрын өмч болгон хадгалж байгаа" гэж мэдээлсэн байна. 

Ерөнхийлөгчийн тамгын газар хариу мэдээлэл өгөөгүй нь маргааныг улам хурцатгаж, иргэний бүлгүүд Авлигын эсрэг хуулийг зөрчсөн байж болзошгүй гэж үзэн прокурорын байгууллагад гомдол гаргасан.

Ким уг хэргийг үгүйсгэсэн ч Chanel-ийн цүнхийг авснаа хүлээн зөвшөөрсөн бөгөөд хожим нь тэдгээрийг ашиглалгүйгээр буцааж өгсөн гэжээ. Прокурорууд өнгөрсөн сард түүнийг "хуулиас дээгүүр зогсож", "үндсэн хуулиар заасан шашин шүтлэг, төрийг тусгаарлах" зарчмыг зөрчих зорилгоор Нэгдсэн Сүмтэй хуйвалдсан гэж үзэн 15 жилийн хорих ял, 2 тэрбум воны торгууль ногдуулахыг шаардсан.

Ичгүүр

Кимийн цуврал дуулианууд нөхрийнх нь ерөнхийлөгчийн карьерт сүүдэр тусгаж байсан ч Өмнөд Солонгосын хамгийн ичгүүртэй удирдагчдын нэг болох хувь заяагаа эцсийн дүнд шийдсэн хүн нь Юн өөрөө байв. 

Юн 2024 оны сүүлээр  улсдаа цэргийн дэглэм тогтоохыг оролдсон нь өөрийгөө хавирсан хэрэг байв. Улмаар анхны шүүх хуралдаанаар түүнд эрх мэдлээ урвуулан ашигласан, баримт бичгийг хуурамчаар үйлдсэн, шударга ёсыг саатуулсан хэргээр яллав. Энэ нь Юны цэргийн дэг журам тогтоох тухай цочирдом зарлигтай холбоотой дөрвөн шүүх хурлын анхны шийдвэр байв. Хэдийгээр богино хугацаанд үргэлжилсэн ч энэ алхам улс орон даяар үймээн самуун дэгдээж, парламентын гишүүд Юны шийдвэрийг хүчингүй болгохын тулд үндэсний чуулган руу яаран очиж үймээн болсон. 

Шүүгч шийдвэр гаргах үеэрээ Юны үйлдэл "улс орныг улс төрийн хямралд оруулсан" гэж хэлээд, Юныг "огт гэмшээгүй" гэж тэмдэглэжээ. Юны цэргийн дэглэм тогтоох оролдлогыг мөрдөн шалгах явцад тусгай прокурорууд эхнэрийг мөн шалгасан. Энэ нь нэг сумаар хоёр туулай агнасан явдал байлаа. Нэгэн цагт хүчирхэг байсан хосууд одоо хамтдаа хэцүү цаг үеийг туулах нь нэгэнт тодорхой болов. Өмнөд Солонгосчууд ерөнхийлөгчөө яллаж, шоронд хорьж байсан түүхтэй. Тэгвэл одоо ерөнхийлөгчөө эхнэртэй нь хорихоор болоод байна. Энэ бол дэлхийн түүхэнд ч анхны үйл явдал. Тэдний энэ ичгүүрийг дэлхий мартахгүй.

Л.Баяр