БНХАУ-ын шүүх Мьянмар улсад байрласан, олон тэрбум ам.долларын залилангийн сүлжээ ажиллуулж байсан гэмт хэргийн томоохон бүлэглэлийн 11 гишүүнийг цаазаар авлаа.
Тэднийг Хятадын төрийн хэвлэлүүд “Мин овгийн бүлэглэл” хэмээн нэрлэж, интернет залилан, хууль бусаар хүн хорьж, хүний амь нас хөнөөсөн зэрэг ноцтой гэмт хэрэгт буруутгасан байна. Уг этгээдүүдийг 2025 оны есдүгээр сард цаазаар авах ял оноосон бөгөөд давж заалдсан хэргийг БНХАУ-ын Дээд шүүх эцэслэн хэвээр үлдээжээ.
Мин овгийн бүлэглэл нь Мьянмарын хойд хэсэгт орших Кокангийн өөртөө засах бүсэд байрлах “Мөлхөж буй барсын харш” нэртэй цогцолбороороо алдартай байв. Тус бүс нутгийн нийслэл Лауккай хот олон тэрбум ам.долларын цахим залилангийн төв болж, хулгайлагдсан болон хуурч авчирсан хүмүүсийг албадан ажиллуулдаг байсныг Хятадын хэвлэлүүд онцолжээ. Оргил үедээ энэ сүлжээнд 10 мянга орчим хүн ажиллаж байсан аж.
Бүлэглэлийн толгойлогч Мин Сюэчанг, түүний хүү Мин Гуопин, ач охин Мин Жэньжэнь нар болон өөр нэг гэмт бүлэглэлийн удирдагч У Хунмин цаазаар авсан хүмүүсийн дунд багтжээ. Тэднийг залилангийн төвөөс зугтахыг оролдсон ажилчдыг санаатайгаар хөнөөж, хууль бусаар хорьсноос 14 Хятадын иргэн амь үрэгдсэн гэж буруутгасан байна. Хятадын эрх баригчид 2023 оноос эхлэн олон улсын дарамт болон ард иргэдийнхээ гомдлууд дээр үндэслэн Мьянмар дахь ийм төрлийн гэмт сүлжээнүүдийг идэвхтэйгээр дарах ажиллагаа эхлүүлсэн юм.
Хятадын Гадаад хэргийн яамны хэвлэлийн төлөөлөгчийн мэдэгдсэнээр, Бээжин цаашид ч мөрийтэй тоглоом, цахим залилангийн тахалыг бүрэн устгахын төлөө хатуу арга хэмжээ авсаар байх болно.
Олон улсын судалгаагаар Зүүн Өмнөд Азид үйл ажиллагаа явуулдаг залилангийн бүлэглэлүүд жил бүр 40 гаруй тэрбум ам.долларын хохирол учруулдаг бөгөөд Мьянмарын хилийн бүс нутагт үүссэн хуульгүй байдал, иргэний дайны нөхцөл нь ийм гэмт хэргийг цэцэглүүлэх хөрс болж иржээ.
Эх сурвалж: CNN
