Инээдмийн кино, телевизийн ертөнцөд мартагдашгүй мөр үлдээсэн жүжигчин Кэтрин О’Хара 71 насандаа таалал төгслөө. Канад гаралтай тэрээр “Гэртээ Ганцаараа” кинонд Кевин Маккалистерын ээж Кэйтийн дүрийг бүтээснээр дэлхий даяарх үзэгчдийн сэтгэлд мөнхөрсөн юм. Ялангуяа хүүгээ санамсаргүйгээр гэртээ орхисноо онгоцонд гэнэт санаад “Кевин!” хэмээн хашхирдаг агшин нь уг киноны хамгийн дурсамжтай хэсгүүдийн нэг болж үлдсэн билээ.

Кэтрин О’Хара уран бүтээлийн гараагаа Торонтогийн Second City-ийн тайзнаас эхлүүлж, улмаар Beetlejuice зэрэг кинонуудаар АНУ-д нэр хүнд олсон. Харин сүүлийн жилүүдэд Schitt’s Creek цувралын Мойра Рөүзийн дүрээр дахин нэг оргилд хүрч, “Эмми”, “Алтан бөмбөрцөг” шагнал хүртэн тэрээр нас ахисан ч авьяас чадвараараа гайхагдсан хэвээр байлаа.

Түүнийг хамтран ажиллагсад нь “онцгой мэдрэмжтэй жүжигчин, гайхалтай хамтрагч, хүн чанартай уран бүтээлч” хэмээн дурсан хүндэтгэж байна. Гэртээ ганцаараагийн ээжийн дүрээс эхлээд Schitt’s Creek-ийн этгээд, тансаг Мойра хүртэлх түүний бүтээсэн эмэгтэй дүрүүд хэдэн үеийн үзэгчдэд инээд, дулаан дурсамж үлдээж, Кэтрин О’Хараг дэлгэцийн түүхэнд мөнхөллөө. Түүний нас барсан шалтгаан нь олон нийтэд нууц хэвээр байна.