Норвегийн гүнж Метте-Маритын хүүг цагдаагийнхан ням гарагт халдлага үйлдсэн хэргээр баривчилжээ. Улмаар түүнийг мягмар гарагт Осло хотод дөрвөн эмэгтэйг хүчиндсэн зэрэг 38 хэрэгт буруутган шүүх хуралд оролцуулсан байна.
29 настай Мариус Борг Хойбиг дөрвөн долоо хоногийн хугацаагаар цагдан хоригдох гэнэ. Цагдаагийнхан түүний эсрэг хүйтэн мэс хэрэглэсэн, хорих байрны заалтыг зөрчсөнтэй холбоотойгоор дахин гэмт хэрэг үйлдэх эрсдэлтэй гэх дүгнэлтийг хуулийн байгууллагад мэдэгдсэн.
Түүнийг баривчилсан гол шалтгаан нь 2024 оны наймдугаар сард түүнтэй харилцаатай байсан эмэгтэйн гомдлын дагуу юм. Тухайн бүсгүй түүнд хүчирхийлүүлсэн гэдгээ зарласан. Энэ нь Хойбигийн хүчингийн хэргээр цагдаа нарт баривчлагдсан дөрөв дэх тохиолдол болж байгаа ажээ. Тэрбээр өөрт нь тулгасан хамгийн ноцтой хэргүүдийг үгүйсгэж байгаа ч зарим жижиг хэргүүдийг хүлээн зөвшөөрсөн. Энэ бол хааны гэр бүлийг зовоосон хамгийн сүүлийн үеийн дуулиан юм.
Өөр нэг дуулиан нь Норвегичууд түүний ээжийг 2011-2014 оны хооронд "бэлгийн хүчирхийлэгч" гэгдээд байгаа Жеффри Эпштейнтэй гурван жилийн турш захидлын харилцаатай байсан гэдэгт бүрэн итгэж эхэлсэн явдал. Гүнж Метте-Марит Эпштейнтэй ойр дотно харилцаатай байсан нь тодорхой болох үедээ олон нийтэд хандан "Жеффри Эпштейн үйлдсэн хүчирхийллийн хохирогчдод гүнээ эмгэнэл илэрхийлж, эв нэгдэлтэй байгаагаа" илэрхийлэхээс гадна, түүнтэй холбоотой байснаа "ичмээр" хэмээсэн.
Мариус Борг Хойби хааны гэр бүлийн гишүүн биш ч гэсэн ханхүү Хоконы хойд хүү хэвээр байгаа. Түүнийг хүчингийн хэрэг, хүчирхийллээс эхлээд хязгаарлалтын захирамжийг зөрчих, 3.5 кг марихуан тээвэрлэх, хурд хэтрүүлэх зэрэг олон зүйл ангиар яллаж байгаа ажээ. Хааны гэр бүл шүүх хуралд оролцохоос өөрийгөө хол байлгахыг эрмэлзэж байгаа бөгөөд өнгөрсөн долоо хоногт Титэм хунтайж Хокон уг хэрэгт холбогдсон эмэгтэйчүүд болон тэдний гэр бүлд хандан "та нарын олонхын хувьд хүнд хэцүү үе байсан, бид та бүхнийг ойлгож байна" гэж мэдэгджээ.
Л.Баяр
