БНХАУ-ын засаг захиргаа цахим гэмт хэрэгтэй илүү чанга аргаар тэмцэх үүднээс "Кибер гэмт хэргээс урьдчилан сэргийлэх, хянах тухай хууль"-ийн төслийг боловсруулжээ. Хил дамнасан онлайн гэмт хэрэг үйлдсэн нь тогтоогдсон Хятад иргэдийг ял эдэлснийх нь дараа гурван жил хүртэл хугацаагаар хилээр гарахыг хориглох зорилготой уг хуулийн төслийг Бээжингийн Олон нийтийн аюулгүй байдлын яам Бямба гарагт зарласан бөгөөд ирэх сар хүртэл олон нийтээс санал авч байгаа юм байна. 

Уг хуулийн төслөөр дамжуулан тус улс хилийн дотор болон гадна үйл ажиллагаа явуулж буй кибер гэмт хэрэгтнүүдийн эсрэг авах хуулийн арга хэмжээгээ чангатгаж, энэ төрлийн гэмт хэрэгт оноох ялыг хоёр дахин нэмэгдүүлэх төлөвтэй байна. 

Мөн тус улс хил дамнасан онлайн луйврыг таслан зогсоох ажлын хүрээнд Зүүн Өмнөд Азийн орнуудтай хамтын ажиллагаагаа хоёр дахин нэмэгдүүлэх юм. Хятадад хууль эрх зүйн маргаанд холбогдсон, ноцтой бус гэмт хэрэг үйлдсэн хүмүүст хилийн хориг тавьдаг. Тэгэхдээ тухайн этгээдэд хилийн хориг тавьсан эсэхийг мэдээлдэггүй. Харин хилээр гарахыг санаархсан үед нь мэдээлдэг ажээ. 

Энэхүү хуулийн төсөл нь Хятадын кибер гэмт хэргийн эсрэг хамгаалалтыг бэхжүүлэх боломжтой гэж эрх баригчид нь үзэж байгаа. Энэ төсөл нь эцсийн шатандаа 2022 онд тус улсад хэрэгжиж эхэлсэн Телеком болон онлайн луйврын эсрэг хуулийн нэмэлт өөрчлөлт болно гэж зарим ажиглагчид үзэж байна.

Хуулийн хүрээнд Хятадын эх газрын хил хязгаар дотор болон гадуур үйлдэгдэж байгаа кибер гэмт хэрэг, кибер гэмт хэргийг дэмждэг үйл ажиллагааг онилохоос гадна төлбөрийн платформ, сервер, данс эсвэл зар сурталчилгаа санал болгодог, эсвэл ажилд зуучлах нэрийдлээр луйвар хийдэг зэрэг кибер гэмт хэрэгтнүүдийг цэгцлэх, ялыг нь чангатгах чухал зорилготой гэнэ.

Мөн "хуурамч мэдээ, зохиомол мэдээлэл тараах, гүтгэх, нийтийн дэг журам, хүлээн зөвшөөрөгдсөн нийгмийн ёс суртахууны эсрэг мэдээлэл нийтлэх, хандалт эсвэл зар сурталчилгааны орлого олох" зэрэг үйлдлүүдийг хянах, эдгээрт шийтгэл оноох зохицуулалт бий гэнэ. 

Л.Баяр