Орос улс Украины эрчим хүчний дэд бүтцэд пуужин болон нисгэгчгүй онгоцоор дайралтаа үргэлжлүүлсэн гэж орон нутгийн албаныхан мягмар гарагт мэдэгдлээ. Ингэснээр мянга мянган айл халаалт, цахилгааны асуудалтай нүүр тулаад байна.
Украинчууд өвлийн улиралд агаарын хэм цочир хүйтэрсэн холбогдуулан Москва, Вашингтоны тохиролцсон богино хугацааны гал зогсоох гэрээ уг довтолгоогоор дуусгавар болж байгаа юм. Нийслэл Киев хотод хэд хэдэн хүчтэй дэлбэрэлт болсон байна.
Кремлийн мэдээлснээр, Оросын Ерөнхийлөгч Владимир Путин өнгөрсөн долоо хоногт АНУ-ын Ерөнхийлөгч Доналд Трампын "хувийн хүсэлт"-ийн дагуу Украины томоохон хотууд болон эрчим хүчний дэд бүтцэд халдлага үйлдэхээ ням гараг хүртэл түр зогсоохоор тохиролцсон юм.
Украины Гадаад хэргийн сайд Андрий Сибиха X дээрх хэлэхдээ, Орос улс Киев, Днепр, Харьков, Сумы, Одесса болон бусад бүс нутгуудад голчлон эрчим хүч, орон сууцны барилгуудыг онилсон гэж мэдэгджээ. Довтолгооны улмаас тус улсын нийслэлд хоёр дүүрэгт бараг 1200 орчим өндөр барилга халаалтгүй болсон гэж хотын дарга Виталий Кличко мэдэгдэв.
Киевийн цэргийн захиргааны дарга Тимур Ткаченко Telegram дээр бичсэнээр, хэд хэдэн олон давхар орон сууцны барилга, цэцэрлэг эвдэрсэн байна. Мөн нийслэлд болсон халдлагын улмаас гурван хүн шархадсан гэж Украины Онцгой байдлын албанаас мэдэгдэв.
Л.Баяр
