Мексик улсын засгийн газар олон улсын хамгийн эрэн сурвалжилж байсан хар тамхины бүлэглэлийн удирдагчийг олж устгасны дараа улс даяар хүчирхийлэл дэгдэж, дор хаяж 25 Үндэсний гвардын цэрэг амь үрэгдсэн гэж албаныхан мэдээлэв. Энэ сарын 22-нд Мексикийн армийн тусгай ангиуд Халиско мужийн Тапалпа тосгонд хар тамхины бүлэглэлийн толгойлогч Немесио Осуэгера Сервантис буюу “Эль Менчо” гэж нэрлэгддэг байсан этгээдийг олж устгасан байна.

Тэрбээр Jalisco New Generation Cartel (CJNG) бүлэглэлийг удирддаг, АНУ болон Мексик даяар эрэн сурвалжлагдаж байсан. Тэр бол дэлхийн нөлөө бүхий кокаин болон фентанилын наймаачдын нэг байв. Түүнийг баривчлах үеэр буудалцаан болсон. Шархадсан Эль Менчо маргааш нь эмнэлэг рүү явах замдаа нас барсан байна. 

Уг үйл явдлын дараа гарсан мөргөлдөөнд дор хаяж 25 Үндэсний гвардын цэрэг амь үрэгдэж, олон зэвсэгт этгээдүүд, сэжигтнүүд мөн нас барсан байна. “Эль Менчо”-гийн үхлээс болж олон мужид зам хаалтын цэгүүд, тэсрэх төхөөрөмжийн довтолгоо, машин шатаах зэрэг хүчирхийллүүд дэгдэж, орон нутгийн агаарын тээвэр, аялал жуулчлалд нөлөөлжээ. 

АНУ-ын Төрийн департамент Эль Менчог баривчлахад хүргэсэн мэдээлэлд 15 сая долларын шагнал амласан. Мексикийн Батлан ​​​​хамгаалах яам Эль Менчог баривчлах ажиллагаанд Мексикийн арми, тус улсын Үндэсний гварди болон Агаарын цэргийн хүчний дэмжлэгтэйгээр явуулсан гэж мэдэгдэв. Өөрөөр хэлбэл уг ажиллагаанд АНУ-ын тал мэдээлэл дамжуулсанаас бусдаар цэргийн хүчээр оролцоогүй аж.

Тус улсын Батлан ​​​​хамгаалахын сайд Рикардо Тревиллагийн хэлснээр, 20 мужид дэгдээд буй үймээнийг намжаахаар 9500 орчим цэрэг байршуулсан гэж мэдэгдэв.

Л.Баяр