БНХАУ-ын Худалдааны яамнаас Японы 20 компани, байгууллагыг “хоёр зориулалттай” (цэрэг болон иргэний хэрэглээнд давхар ашиглах боломжтой) бараа, технологийн экспортын хязгаарлалтын жагсаалтад оруулсан тухай албан ёсоор мэдээллээ.

     Хязгаарлалтад Японы хүнд үйлдвэрийн салбарын томоохон аж ахуйн нэгжүүд болох Mitsubishi Heavy Industries, IHI Corporation, Kawasaki Heavy Industries багтсан байна.

     Хятадын талын мэдээлснээр, дээрх байгууллагуудад dual-use ангилалд хамаарах бараа, технологи экспортлохыг хориглож, шаардлагатай тохиолдолд тусгай зөвшөөрөл авах журмыг мөрдүүлэхээр болжээ. Мөн гадаад дахь хувь хүн, хуулийн этгээдүүдэд Хятадаас гаралтай ийм төрлийн бүтээгдэхүүнийг дамжуулах, нийлүүлэхийг зогсоохыг анхааруулсан байна.

     Эдгээр компаниуд нь сансар, нисэх хүчин, усан онгоц үйлдвэрлэл, эрчим хүч, хүнд машин механизм зэрэг стратегийн ач холбогдол бүхий салбарт үйл ажиллагаа явуулдаг бөгөөд Японы батлан хамгаалах болон иргэний үйлдвэрлэлийн томоохон нийлүүлэгчид юм.

Японы Засгийн газрын зүгээс уг шийдвэрийг хүлээн зөвшөөрөх боломжгүй хэмээн мэдэгдэж, нөхцөл байдлыг судалж байгаагаа илэрхийлсэн байна.

     Мягмар гарагт холбогдох компаниудын хувьцааны ханш буурсан байна. Mitsubishi Heavy Industries 3.1%, IHI Corporation 5.73%, Kawasaki Heavy Industries 4.02%-иар тус тус унасан талаар олон улсын хэвлэлүүд мэдээлжээ.

Т.Зузу