Ойрхи Дорнодод үүсээд буй хурцадмал нөхцөл байдал олон улсын агаарын тээврийн салбарт шууд нөлөөлж, дэлхий даяарх нислэгүүдэд томоохон саатал үүсгэж эхэллээ. АНУ болон Израиль-ийн Иранд чиглэсэн цэргийн ажиллагааны дараа Иран болон бүс нутгийн хэд хэдэн улс агаарын орон зайгаа хааж, нислэгийн хөдөлгөөнийг зогсоох, чиглэлийг өөрчлөх шийдвэр гаргасан байна.

     Агаарын орон зай хаагдсанаар бүс нутгийн гол зангилаа төвүүд болох Dubai International Airport, Hamad International Airport, Zayed International Airport-уудын үйл ажиллагаа доголдож, тэдгээрээр дамжин Европ, Ази, Америк тивийг холбодог олон мянган нислэг саатжээ. Эдгээр буудлууд нь жил бүр олон арван сая зорчигч хүлээн авдаг дэлхийн хамгийн ачаалалтай транзит төвүүдийн тоонд ордог.

Олон улсын авиацийн шинжээчдийн мэдээлснээр сүүлийн өдрүүдэд дэлхий даяар 18–19 мянга орчим нислэг саатаж, 2–3 мянга гаруй нь бүрэн цуцлагдсан байна. Зарим улсад зөвхөн нэг өдрийн дотор хэдэн зуун олон улсын нислэг хойшлогдсон тухай албаны эх сурвалжууд мэдээлжээ.

     Агаарын тээврийн компаниуд аюулгүй байдлыг нэн тэргүүнд тавьж, зарим чиглэлд нислэгээ түр зогсоох, эсвэл урт тойруу маршрутаар нисэх шийдвэр гаргасан нь нисэх хугацааг уртасгаж, түлшний зардлыг нэмэгдүүлж байна.

     Зорчигчдын хувьд нөхцөл байдал амаргүй байна. Олон мянган хүн дамжин өнгөрөх буудлуудад гацаж, шинэ холболт хайх, буцаан олголт авах, зочид буудалд байрлах шаардлагатай болжээ.

     Шинжээчдийн дүгнэлтээр, хэрэв бүс нутгийн хурцадмал байдал намжихгүй бол агаарын тээврийн саатал хэд хоногоос хэдэн долоо хоног үргэлжилж болзошгүй аж. Ойрхи Дорнод нь Европ, Азийг холбосон стратегийн чухал агаарын коридор учраас энд үүссэн аливаа тогтворгүй байдал дэлхийн нислэгийн сүлжээнд шууд нөлөөлдөг.

     Одоогоор агаарын тээврийн компаниуд зорчигчдод нислэгийн мэдээллээ тогтмол шалгах, шаардлагатай тохиолдолд дахин захиалга хийх, буцаан олголтын нөхцөлийг судлахыг зөвлөж байна. Нөхцөл байдал хэрхэн өрнөхөөс шалтгаалан олон улсын нислэгийн урсгал цаашид ч хэлбэлзэх төлөвтэй байна.

Т.Зузу