Сүүлийн хэд хоногт Ойрхи Дорнодод нөхцөл байдал хурцдаж, АНУ, Израиль, Иран хоорондын цэргийн мөргөлдөөн эрчимжиж байна. Мөргөлдөөн эхлэх гол шалтгаан нь Ираны цөмийн болон пуужингийн хөтөлбөр, бүс нутгийн аюулгүй байдалд учирч буй эрсдэлтэй холбоотой урт хугацааны геополитикийн  хурцадмал асуудал юм. Мөн АНУ болон Израиль агаарын довтолгоо хийсэн нь нөхцөл байдлыг улам хурцатгаад байна.

Ираны дээд удирдагч агаарын цохилтоор амь үрэгдсэн бөгөөд олон өндөр албан тушаалтнууд, цэргийн удирдагчид энэ мөргөлдөөнд өртсөн тухай мэдээллээд байна. Хамгийн харамсалтай нь энгийн иргэд, хүүхэд, эмэгтэйчүүд олон тоогоор шархадсан бөгөөд нөхцөл байдал улам хүндэрч байна. Ираны пуужин, дрон ашигласан довтолгоо Израиль болон АНУ-ын цэргийн баазуудад чиглэж, мөргөлдөөн улам өргөжиж байгаа юм.

Олон улсын байгууллагууд, тэр дундаа НҮБ-ын Аюулгүйн Зөвлөл яаралтай хуралдаж, талуудыг мөргөлдөөнийг зогсоох, нөхцөл байдлыг намжаахыг уриалсан боловч одогоор тодорхой шийдэлд хараахан хүрээгүй хэвээр байна.

Шинжээчдийн үзэж буйгаар тус мөргөлдөөн нь бүс нутгийн тогтвортой байдалд томоохон эрсдэл учруулж, нефтийн үнэ, эдийн засгийн хэлбэлзэлд шууд нөлөөлөх магадлалтай гэж анхааруулж байна.

Монгол Улсын хувьд тухайн бүс нутагт оршин суудаг монгол иргэдийн аюулгүй байдал, импортын эрчим хүч, нефтийн үнэ, гадаад бодлогын хувьд анхаарлаа хандуулах нөхцөл байдлыг бий болгоод байна.

Тухайлбал, Ойрхи Дорнодод ажиллаж, оршин суугаа 350 орчим монгол иргэн нь аюулгүй байдлын хувьд эрсдэлд өртөх магадлалтай байгаа тул “Гадаад харилцааны яам”-наас  мэдээллийг тогтмол шинэчилж, шаардлагатай тохиолдолд консулын дэмжлэг үзүүлэхээр ажиллаж байгаа аж.

Энэхүү мөргөлдөөн дэлхий дахины улс төр, эдийн засаг, аюулгүй байдалд шууд нөлөө үзүүлж байгаа бөгөөд Монгол Улсын өнцгөөс авч үзвэл гадаад бодлого, эдийн засаг, иргэдийн хамгаалалттай шууд холбоотой үйл явдал болж байна.

Т.Зузу