Франц улс цөмийн зэвсгээ нэмэгдүүлж, Европын бусад орнуудыг хамран хүрээгээ тэлэх нь цөмийн батлан хамгаалах бодлогынх нь томоохон дэвшил гэж харж байна. Францын Ерөнхийлөгч Эммануэль Макрон хэлсэн үгэндээ, дээрх өөрчлөлтийг улам бүр тогтворгүй болж буй стратегийн орчинд үзүүлж буй хариу арга хэмжээ гэж тайлбарлав.
"Дараагийн 50 жил цөмийн зэвсгийн эрин үе байх болно" гэж тэр нэмж хэлээд, Францын цөмийн цэнэгт хошууны тоог одоогийн байгаа 300-аас нэмэгдүүлнэ гэж мэдэгдэв. Сонирхуулахад, Европ тивд цөмийн зэвсэгтэй хоёрхон улс байдаг нь Франц, Их Британи билээ.
Тэрбээр 2036 онд "Ялагдашгүй" нэртэй цөмийн зэвсэгтэй шинэ шумбагч онгоцыг хөөргөхөөр болсноо зарласан. Тэр мөн Их Британи, Герман, Польш, Нидерланд, Бельги, Грек, Швед, Дани зэрэг Европын бусад найман орон шинэ стратегид оролцохоор тохиролцсон гэж мэдэгдэв.
Польшийн Ерөнхий сайд Дональд Туск X дээр бичсэнээр уг шийдвэрийг дурдаж, "Дайснууд маань хэзээ ч хамаагүй бидэн рүү дайрч болзошгүй үед сэргийлж бид найзуудтайгаа хамт зэвсэглэж байна" гэжээ.
Судлаачдын тодорхойлсноор 1960 оноос хойш анх удаа болж буй Францын стратегийн энэхүү өөрчлөлт нь тухайн үеийн Ерөнхийлөгч Шарль де Голлын тодорхойлсон анхны ойлголтын ихэнх хэсгийг хэвээр хадгалах юм. Өөрчлөлтөөр Франц түнш орнууддаа тодорхой "баталгаа" олгохгүй бөгөөд цөмийн пуужин харвах шийдвэрийг дангаар нь гаргах эрх мэдэл нь Францын ерөнхийлөгчид хэвээр байна.
Л.Баяр
