Иракийн Эрбил мужид нисгэгчгүй онгоцны халдлагад зургаан Франц цэрэг шархадсан тухай Ройтерс, AFP зэрэг мэдээллийн агентлагууд мэдээлэв. Тэднийг ойролцоох эмнэлгийн төвд хүргэсэн гэж Ройтерс агентлаг Францын армийн мэдэгдлээс эш татжээ.

Армийн мэдэгдэлд тэдний гэмтэл бэртэл болон дроны гарал үүслийн талаар дэлгэрэнгүй мэдээлэл өгөөгүй байна. Франц улс Эрбил мужид олон зуун цэрэгтэй. Тэд Исламын улс бүлэглэлийн босогчидтой тэмцэж буй олон улсын эвслийн нэг хэсэг болон тэнд байрлаж байв.

Хагас автономит Курдистаны бүс нутагт орших Эрибил нь Ирантай хиллэдэг хилээс баруун тийш 115 км зайд оршдог. 

                 Халдлагын үеэр Францын нэг цэрэг амиа алдаж, хэд хэдэн хүн шархадсан гэж Францын Ерөнхийлөгч Эммануэль Макрон мэдэгдэв.

Тэрбээр өнгөрсөн сарын сүүлээр Иранд дайн эхэлснээс хойш Францын анхны цэргийн албан хаагч нас барсныг дуулгаад, түүний нэрийг Ахлах дэслэгч Арно Фрион гэдэг хэмээжээ.

Макрон олон нийтийн сүлжээнд "Түүний гэр бүл, зэвсэгт ах дүү нарт нь би үндэстнийхээ бүхий л хайр энэрэл, эв нэгдлийг илэрхийлмээр байна. Манай хэд хэдэн цэрэг шархадсан. Франц улс тэдний талд, хайртай хүмүүстэй нь хамт зогсож байна" гэж бичжээ.

Макрон мөн тус бүс нутагт Исламын улстай тэмцэж буй Францын хүчний эсрэг хийсэн халдлагыг "хүлээн зөвшөөрөхгүй" гээд, "Тэдний Ирак дахь оролцоо нь терроризмын эсрэг тэмцлийн хатуу хүрээний нэг хэсэг юм. Ираны дайн ийм халдлагыг зөвтгөж чадахгүй" гэжээ.

Л.Баяр