Калифорнийн шүүх технологийн аварга компаниуд болох Мета болон YouTube-ийг баг насны хүүхдийг санаатайгаар донтуулж, сэтгэцийн эрүүл мэндэд нь хохирол учруулсан хэмээн буруутгасан нь түүхэнд тэмдэглэхүйц үйл явдал боллоо. 

Мета болон YouTube компаниуд платформуудынхаа агуулгад хайхрамжгүй хандсан, дизайн нь аюултай гэдгийг мэдэж байсан, эдгээр эрсдэлийн талаар хэрэглэгчдэд анхааруулаагү, хэргийн нэхэмжлэгчид ихээхэн хохирол учруулсан гэж шүүх бүрэлдэхүүн үзсэн байна. 

Энэ шийдвэр нь хэдэн зуун ижил төстэй хэргийн жишиг болж, ялангуяа залуу хэрэглэгчдийн хувьд нийгмийн сүлжээний платформуудын үйл ажиллагаанд томоохон өөрчлөлт оруулахаас гадна технологийн компаниудад олон сая ам.долларын алдагдал учруулах эрсдэлтэй гэж шинжээчид үзэж байна. 

Энэ хэрэг нь сэтгэцийн эрүүл мэндийн асуудлаас эхлээд бэлгийн мөлжлөг хүртэл хүүхдүүдэд онлайн хор хөнөөл учруулж байгаа талаар эцэг эхчүүд, хууль тогтоогчдын олон жилийн турш санаа зовж ирсэн асуудалд эргэлтийн цэг болох нь гарцаагүй. 

Калифорни мужийн иргэн 20 настай Кейли хэмээх бүсгүй ээжийнхээ хамт Meta, Google-ийн YouTube, Snap, TikTok зэрэг компаниудыг хүүхэд байхад нь санаатайгаар донтуулж, сэтгэлийн түгшүүр, бие махбодийн дисморфи, амиа хорлох бодол төрүүлсэн хэмээн буруутгаж шүүхэд өгчээ. Snap болон TikTok нар шүүх хурал болохоос өмнө хэргийг шийдвэрлэсэн байна. 

Лос Анжелесийн Дээд шүүхэд долоон долоо хоног үргэлжилсэн шүүх хурлын дараа шүүх бүрэлдэхүүн найман хоногоос дээш хугацаанд хэлэлцүүлэг өрнүүлж, компаниудаас нийт 3 сая долларын нөхөн төлбөр төлөхийг тушаажээ. 

Шүүгчид мөн YouTube-д нэмэлт 900 мянган ам.долларын торгуулийн нөхөн төлбөр, Meta-ийн хэвлэлийн төлөөлөгчийн хэлснээр Meta-аас 2.1 сая ам.долларын торгуулийн нөхөн төлбөр төлөхийг шаардсан байна. Кейлигийн хохирлын 70 хувийг Мета, 30 хувийг YouTube хариуцах ёстой гэж шүүх мөн үзэв. 

Л.Баяр