Дэлхийн хамгийн алдартай, ашиг орлоготой тамирчин, дөрвөн хүүхдийн эцэг Дэвид Бекхэмийн “People” сэтгүүлд өгсөн ярилцлагыг хүргэж байна. Тэрбээр өнгөрсөн долдугаар сард эмэгтэйчүүдийн загварын сэтгүүл “Elle”-ийн нүүрэнд гарсан анхны эрэгтэй болсон билээ.

    Дэлхийн хамгийн алдартай, ашиг орлоготой тамирчин, дөрвөн хүүхдийн эцэг Дэвид Бекхэмийн “People” сэтгүүлд өгсөн ярилцлагыг хүргэж байна. Тэрбээр өнгөрсөн долдугаар сард эмэгтэйчүүдийн загварын сэтгүүл “Elle”-ийн нүүрэнд гарсан анхны эрэгтэй болсон билээ.

-Та бол англи эрчүүдийн дээд төрх. Таны амьдралд англи боловсрол, хэв маяг ямар нэг мэдрэмжийг төрүүлдэг үү?

-Би Англиас өөр газар 10-аад жил амьдарсан гэвч энэ юуг ч өөрчлөөгүй. Би хаанаас ирсэн, гарал угсаагаа хэзээ ч мартахгүй. Хаана амьдарч байх нь хамаагүй, би бол Англи хүн. Мөн би хүүхдүүдээ Англи хүмүүжилтэй болгон өсгөхийг хичээдэг. Нарлаг Калифорнид энэ бүхнийг яаж хийдэг вэ? гэвэл “Бид англи хоол иддэг, бидний эргэн тойронд англи хүмүүс ажилладаг. Бидний дөрвөн хүүхдийн гурав нь Англид хэзээ ч амьдарч байгаагүй, ийм үед хүүхдүүддээ англи ёс заншил хэвшүүлэх хэцүү л дээ. Гэхдээ л Викториа бид хоёр хүүхдүүдээ бидний эцэг эх биднийг яаж өсгөсөн яг түүгээр өсгөхийг хичээдэг, Бид Англи ёс заншлаа хадгалж үлдсэн, хүүхдүүддээ ч хатуу замаар зааж сургадаг. Бидний хүүхдүүд Англи сэтгэхүйтэй, тэд энгийн хүүхдүүд.

-Таны хувьд сүүлийн хэдэн арван жил үерхсэн хамгийн сайн найз чинь хэн байсан бэ?

-Миний хувьд бол Том Круз маш сайн хүн. Тэр миний мэдэх хамгийн хөдөлмөрч, хэзээ ч зогсдоггүй хүн. Мөн тэр гайхалтай аав.

-Тэгвэл шашны тал дээр таны бодол? Бекхэм бурханд итгэдэг үү?

-Миний шивээсний ихэнх нь шашны холбогдолтой байдаг болохоор хүмүүс намайг шашинлаг хүн гэж боддог. Би бүх шашныг хүндэтгэдэг, тийм гүн гүнзгий шүтлэгтэй биш. Гэхдээ зөв замаар амьдрахыг хичээдэг, бусдыг хүндэлдэг. Би шүтлэгтэй гэр бүлд өсөөгүй, гэхдээ ямар нэг зүйл биднийг харж ханддаг гэдэгт итгэдэг. Хүн бүрт өөрсдийн итгэл үнэмшил байдаг, тиймээс би бүх шашныг хүндэлдэг.

-Тэгвэл танд улс төрийн үзэл бодол байдаг уу? Үгүй

-Сонгууль өгдөг уу? Бас л үгүй, учир нь үргэлж эх орноосоо хол, өөр газар амьдардаг байсан болохоор.

-Миний бас нэгэн сонирхсон зүйл бол танд хөл бөмбөгөөс өөр хобби байдаг уу?   

-Бараг л үгүй, надад хоббинд зарцуулах цаг зав байдаггүй. Өдрийн туршид ажилдаа хобби мэтээр ханддаг. Энэ бол миний хийх дуртай хайртай зүйлүүдийн маань нэг.

-Та эхнэр Викториагаа урьд өмнө түүнтэй уулзаж байгаагүй хүнд таниулахын тулд хэрхэн дүрслэх вэ?

-Тэр дур булаам сайхан бүсгүй, хөгжилтэй, ер бусын онцгой авяастай. Өмнө нь “Spice Girls” хамтлагт байхдаа ч тэр, одоо загвар зохион бүтээгчийн хувьд ч тэр. Мөн маш журамтай хүн. Зорьсондоо хүрэхийн тулд юу хийх ёстойгоо сайн мэддэг. Хамгийн чухал нь Викториа бол гайхалтай ээж. Энэ нь түүнийг хамгийн хүчирхэг болгодог зан чанар. Түүний нөхөр, түүний хүүхдүүдийн эцгийн хувьд эхнэрийгээ хүүхдүүдтэйгээ жаргалтай байхыг харахаас илүү сайхан зүйл гэж хаана ч байхгүй.

-Викториа, Дэвид хоёр 15 жилийн турш гэр бүл болон хамт амьдарч байгаа. Та хоёрын гэр бүлийн нууц жор юу вэ?

-Хичнээн ч их ажилласан бай бид хүүхдүүдтэйгээ гэр бүлээрээ байх цаг заавал гаргадаг. Энэ бол бидний нэгдүгээрт тавьдаг зарчим, долоо хоногт нэг удаа гэр бүлээрээ гадуур хооллодог. Хэчнээн их ажилтай, завгүй байсан ч юу хийх ёстой түүнийгээ л хийдэг. Хүүхдүүд маань бидний үнэт зүйлс. Бид хоёулаа маш шаргуу завгүй ажилладаг ч нэг нь заавал хүүхдүүдтэйгээ цуг байдаг. Намайг байхгүй үед Викториа хүүхдүүдтэйгээ байж, түүнийг байхгүй үед би хүүхдүүдтэйгээ цуг байдаг.

-Та бол хөл бөмбөгийн супер од, сая сая хүмүүс таныг шүтэн биширдэг. Тиймээс таны хүүхдүүдэд ямар нэгэн дарамт байдаг уу?

-Тиймээ тэдэнд маш их дарамт байдаг.  Гэвч үнэнийг хэлэхэд тэд үүнийг тоодоггүй, өөртөө итгэлтэй сайн хүүхдүүд.

-Брүклин, Ромео болон Круз гэсэн гурван сайхан хүүтэй болсны дараа 2011 онд Бекхэм анх удаа охин Харпер Севений аав болсон. Тэр үед ямар сэтгэгдэл төрсөн бэ?

-Би одоо ч гэсэн итгэж чаддаггүй. Хөөрхөн, нүд нь байнгын гайхширсан байдалтай бяцхан охин надад байна. Энэ бол үнэхээр гайхалтай.

-Дэвид болон Викториа нар бол брэнд. Таны брэнд юун дээр оршин тогтнодог бол? Үүний үнэ цэнэ юунд байдаг бол?

-Миний брэндийн гол үнэ цэнэ шаргуу ажилладагт оршдог.

-Хэрвээ таны карьер энэ хүрээд зогсох байсан бол та бусдад ямраар дурсагдахыг хүсэх вэ?

-Зүгээр л шаргуу хөдөлмөрч хөл бөмбөгчин. Хамгийн түрүүнд би сайн амжилттай хөл бөмбөгчин гэж дурсагдахыг хүсч байна. Учир нь энэ бол миний олон жил хийсээр ирсэн ажил минь.