Израилын парламент Даваа гарагт маргаантай хуулийн төслийг баталж, терроризм болон үндсэрхэг үзэлтэй аллагын хэргээр ял шийтгүүлсэн Палестинчуудад цаазаар авах ялыг үр дүнтэйгээр өргөжүүлэхээр тохиролцов. Энэ нь тус улсын хэт барууны үзэлтнүүдэд арван гаруй жилийн турш тулгамдаж байсан асуудал юм.

Хуулийн төсөлд Баруун эргийн оршин суугчдыг Израил улсын оршин тогтнолыг үгүйсгэх зорилгоор Израилын иргэнийг хөнөөсөн тохиолдолд цаазаар авах ял оноохоор заасан. Шүүх нь "онцгой шалтгаан эсвэл нөхцөл байдал"-д үндэслэн цаазаар авах ялын оронд бүх насаар нь хорих ял оноох эрхтэй байх аж. Хуулийн төсөлд Израилын Шоронгийн алба ял оноосноос хойш 90 хоногийн дотор давж заалдах эрхгүйгээр дүүжлэх замаар цаазаар авах ялыг гүйцэтгэхээр тусгажээ. 

Мөн цаазаар авах ялыг зөвхөн үндсэрхэг үзэлтэй гэмт хэрэгт буруутгагдсан палестинчуудад оноох шийтгэл болгон тогтоосон. Гэвч эсрэгээрээ еврей израилчуудын палестинчуудын эсрэг үйлдсэн үндсэрхэг үзэлтэй аллагыг цаазын тогтоолоос хассан нь хүний ​​эрхийн байгууллагуудын эсэргүүцлийг төрүүлж байна.

Баруун эрэг дэх Палестинчууд цэргийн хуульд захирагддаг бол Израилын суурьшигчид Израилын иргэний хуульд захирагддаг байв. Харин энэхүү шинэ хуулийн төсөлд эзлэгдсэн Баруун эрэг дэх цэргийн шүүхийн дүрмийг өөрчилж, шүүгчдэд санал нэгтэй шийдвэр гаргах шаардлагагүйгээр цаазаар авах ял оноох боломжийг олгож байна.

Засгийн газар тусгай шүүх байгуулах тусдаа хуулийн төслийг сурталчилж байгаа тул 2023 оны 10 дугаар сарын 07-нд болсон аллагад оролцсон ХАМАС бүлэглэлийн дайчдад энэ хууль хамаарахгүй ажээ. 

Л.Баяр