Энэтхэгт энэ зун зарим хэсэгт агаарын температур 45 хэмээс дээш гарах төлөвтэй байна. Гэвч Ирантай хийж буй дайн нь Энэтхэгийн 6 тэрбум ам.долларын үнэтэй савласан усны үйлдвэрлэлийг дарамтад оруулж байгаа бөгөөд үйлдвэрлэгчид чухал түүхий эдийн хомсдолтой тулгарч буй.
Өнгөрсөн сард зах зээлд тэргүүлэгч "Bisleri" компани барааныхаа үнийг 11 хувиар нэмэгдүүлсэн нь нэг литрийн савтай ундааны үнэ 24 рупи буюу 0.26 ам.доллараар өсөхөд нөлөөлжээ. "Bailley", "Clear Premium Water" зэрэг брэндүүд ч мөн үнээ нэмсэн гэж Reuters агентлаг мэдээлэв.
Энэтхэгийн "Data" компанийн судалгаагаар хотын өрхийн 15 орчим хувь, хөдөөгийн өрхийн 6 хувь нь ундны хэрэгцээндээ савласан уснаас хамааралтай байдаг. Савласан ус хэрэглэх нь ялангуяа хөдөө орон нутгийн хүмүүст үнэтэй байдаг. Энэтхэгийн ихэнх нутгаар ялангуяа зуны улиралд усны хомсдол, гүний усны бохирдол, дэд бүтцийн эвдрэл зэрэг шалтгааны улмаас цэвэр усны хүртээмж бэрхшээлтэй хэвээр байна.
Брэндүүд болон лонх үйлдвэрлэгчид удаан үргэлжилсэн дайн нь олон Энэтхэгчүүдийн хувьд чухал бараа бүтээгдэхүүнийг хэт өндөр үнэтэй болгох эрсдэлтэй гэж анхааруулж байна. Дэлхийн газрын тос, шингэрүүлсэн байгалийн хийн 20 орчим хувь нь ихэвчлэн Ираны бараг бүрэн хаасан Ормузын нарийн хоолойгоор дамждаг. Тээвэрлэлтийн тасалдал нь дэлхийн шатахууны үнийг огцом өсгөсөн.
Дотоодын хэрэгцээгээ хангахын тулд газрын тос, байгалийн хийн импортоос ихээхэн хамааралтай Энэтхэг улс ийнхүү дарамтыг мэдэрч эхлэв.
Энэтхэгийн PET сав баглаа боодлын зах зээлийн хэмжээ 2024 онд 1.5 тэрбум ам.доллар байсан бөгөөд 2033 он гэхэд 2.2 тэрбум ам.долларт хүрнэ гэж тооцоолжээ. Савласан ус, ундаа, шар айрагнаас гадна PET сав баглаа боодлыг гоо сайхан, эмийн үйлдвэрлэл, тэр ч байтугай ресторан, хоол хүргэлт зэрэг салбарт өргөн ашигладаг бөгөөд хэрэглэгчид тав тухтай байдал, боломжийн үнийг эрэлхийлдэг.
Л.Баяр
