Амьд хөгжмийн Монголдоо анхдагч Visual Kei урсгалаар уран бүтээлээ туурвидаг “Visual Moon” хамтлагийн Казуяа буюу Б.Шижиртэй уулзаж ярилцлаа.

    -Танай хамтлаг анх хэзээ байгуулагдаж байв. Анхны уран бүтээл болоод хамтлагийнхаа талаар ярихгүй юу?
 -За манай хамтлаг анх 2009 оны хоёр сарын 14- нд байгуулагдаж байсан. Одоо 4 дэх жилрүүгээ орж байна. Анх хамтлаг байгуулах санааг манай хамтлагийн хоёр ихэр  буюу Тэмүүлин, Тэмүүжин маань  гаргаж байсан. Анх зургаан  хүний бүрэлдэхүүнтэй байсан бол явцдаа бүрэлдэхүүнд өөрчлөлт орж тавуулаа болсон.  Хамтлагийн дуучин Тэмүүлин, гитарчин  Тэмүүжин, басс гитарчин Казуяа, Соло гитарчин Буянаа, бөмбөрчин Түмээ гэсэн уран бүтээлчдийн бүрэлдэхүүнтэй. Уран бүтээлийн хувьд одоогоор олон нийтэд 3 дуу, 2 клип цацсан байгаа.

-Танай хамтлагийг хараад байхад их өвөрмөц стильтэй юм аа. Яг ямар стилиэр уран бүтээлээ туурвидаг вэ?
-Анх бид нар Японий Visual Kei урсгалийг  баримтлан Монгол улсдаа энэ чиглэлийн анхны  хамтлаг  болж гарч ирсэн. Гаднах стилийн хувьд одоог хүртэл энэ урсгалаа баримталдаг харин уран бүтээлийн хувьд бол дотроосоо гарсан зүйлээ хийдэг.  Мэдээж энэ урсгалаа тодорхой хэмжээгээр баримталж явдаг.

- Мэдээж ямар ч уран бүтээлч анх гарч ирэхэд бэрхшээлтэй зүйл олон тохиолддог. Танай хамтлагийн хувьд ямар бэрхшээл тулгарч байв? Магадгүй стиль имижийг чинь зарим нэг залуус шүүмжилж байв уу?
- Манай хамтлаг Монголдоо анхны ийм стильтэй хамтлаг.  Анх гарч ирж байх үед Монголчууд маань их гайхаж бас янз янзаар хэлдэг байсан. Гэхдээ зорьсон зорилго маань байгаа болохоор тэр үед хүмүүсийн үгийг  авахыг нь аваад, хаяхыг нь хаясан. Тиймээс ч  өдийг хүртэл тарж бутралгүй,  оршин тогтносоор байгаа юм болов уу? Өөр  хүндрэлтэй санагдаж байсан зүйл байхгүй. Бүгд л адилхан зорилгынхоо төлөө ямар нэгэн бэрхшээлтэй  учирж,  тэрнийгээ давах хэрэгтэй байдаг. Гэхдээ бас биднийг ойлгож дэмждэг найз нөхөд гэр бүлийнхэн  мөн өөр олон хүмүүс байдаг болохоор  тэрэндээ урамшиж явдаг даа.

- Тэгэлгүй яахав. Гэр бүл найз нөхдөөс гадна Монголын нэр бүхий уран бүтээлчдээс хамтарч ажиллах санал ирж байна уу?.  Хэр дэмжиж байна?
- Одоогоор хамтарч уран бүтээл хийе гэсэн санал орж ирээгүй байгаа.  Гэхдээ биднийг үргэлж дэмжиж ажилладаг хүмүүс олон бий. “Нэгүн” студийн захирал Оки ах , дууны инженер Туана ах нар маань байна. Энэ ах нартаа баярлаж явдгаа илэрхийлье.

- Танай хамтлаг дууныхаа үг,  аяыг өөрсдөө зохиодог гэж сонссон. Энэ талаар?
- Хамтлагийн уран бүтээлийн хувьд бүгд л оролцдог.  Дууны  үг,  ая гишүүн бүрийн ороцоотойгоор төрөн гардаг.  Учир нь энэ чинь нэг хүнээс бус хамтлаг дундаас бий болж байгаа уран бүтээл шүү дээ. Түүнээс гадна  хамтлагийн маань дуучин Тэмүүлин цөөнгүй  хамтлаг,  дуучдын дууны үгийг зохиосон байгаа.   Тухайлбал,  "Киви" хамтлагийн  “Brabrabra” дуу,  "Extacy“ хамтлагийн "Glorious”,  мөн  дуучин Сэрчмаа  гэх зэрэг уран бүтээлчдийн дууны үгийг зохиосон.

- Одоогоор шинэ уран бүтээл дээр ажиллаж байгаа юу?
- Манай хамтлагийн хувьд их олон шинэчлэлт хийсэн. Одоогоор дууныхаа ажилд орцгоосон байгаа. Удахгүй шинэ оны дараагаас үзэгчид, сонсогчиддоо цацаж эхэлнэ.

-Залуу, эрч хүчтэй хүмүүс юм чинь өмнөө том зорилго тавьсан байгаа байх.  Ганц Монголдоо гэлтгүй гадны орнуудад дуу хоолойгоо хүргэнэ гэж боддог л биз дээ?
- Тэгэлгүй яахав. Манай хамтлаг зөвхөн Монголдоо бус гадаадын улс орнуудад цөөнгүй сонсогчидтой болоод байгаа.  Тухайлбал Орос,  Япон, Перу,  Украйн  гэх мэт орнуудад өөрсдийн бяцхан хүрээлэлийн сонсогчидтой болсон.  Итали,  Франц болон Германы сонин сэтгүүлүүд дээр гарч байсан. Мөн Японы NHK болон VijuCafe гэх онлайн  телевизээр  үзэгч, сонсогчидтойгоо уулзаж байсан.  

- Германы ямар сонин бил ээ дээ, би үзэж байсан юм байна?
-Тийм үү. Германы “Bild” сонинд ярилцлага өгч байсан.

-Танай хамтлаг нүүр будалт,  стиль имижээ хэрхэн бүрдүүлдэг вэ?
- Нүүр будалтын тал дээр гоо сайхан ч гэлтгүйгээр өөрсдөө  нүүр будалтаа  хийдэг. Харин үс засалт мөн үсний өнгөний асуудлыг “Utsuka”  салоны Ука ах маань бидний сэтгэлд нийцүүлэн засч янзалдаг.

-Нүүр будалт гэдэг бол танай хамтлагийн гол имижийн нэг байх?
- Тиймээ  нүүр будалт бол манай хамтлагийн салшгүй нэг хэсэг. Монголчууд маань  нүүрээ будаад явахаар  янз янзаар хэлдэг. Гэхдээ нүүрээ будлаа гээд бид бүхэн “гомо” эсвэл ямар нэгэн гаж сэтгэхүйтэй хүмүүс биш. Бид бол эгэл жирийн л хүмүүс.  Мөн бид хамтлаг дотроо өөр өөр дүр төрхийг илэрхийлдэг.  Миний хувьд бол өөрийн имижээ шивээсээрээ тодорхойлдог.

- Монголчууд нүүр будалтыг ойлгодоггүй гэж хэллээ л дээ. Тэгэхээр тэдгээр хүмүүст юу гэж хэлмээр байна вэ?
-Монголчууд бид нар чинь ардчилсан нийгэмд амьдардаг хүмүүс. Юу өмсөж зүүх, юу хэрэглэх нь өөрсдийн дур.  Гол нь өөрсдийн дуртай зүйлээ хийгээд,  үзэл бодлоо чөлөөтэй нээж гаргаж,  нэгэндээ хүндэтгэлтэй, соёлтой байгаасай гэж хэлье даа.

-Ярилцлага өгсөнд баярлалаа. Танай хамтлагт уран бүтээлдээ улам их амжилт гаргахыг хүсье. Мөн удахгүй болох шинэ жилийн мэнд хүргье.