Петер Магяр Унгарын ардчилсан шилжилтийн үед өсөж торнихдоо Виктор Орбаны зурагт хуудсыг унтлагын өрөөнийхөө хананд наадаг байжээ. Тухайн үед Орбан нь Зөвлөлтийн цэргүүдийг Унгараас гаргахыг шаардаж байсан либерал коммунист үзэлтнүүдийн нэг байв. Одоо тэр Орбаны Унгарын ерөнхий сайдаар ажилласан 16 жилийн замналыг дуусгав.

Ням гаргийн парламентын сонгуулийн санал хураалтын дүн Магярын талд гарав. Түүний тухай бид юуг мэдэх ёстойг хүргэе. 

Чийрэг, цэмцгэр хувцасласан, 45 настай, Орбанаас 17 насаар дүү Магяр нь Будапештийн чинээлэг гэр бүлээс гаралтай. Түүний хамаатнууд нь хуульчид, шүүгчид, мөн Орбаны Ерөнхий сайдын анхны бүрэн эрхийн хугацаанд 2000-2005 онуудад Унгарын ерөнхийлөгчөөр ажиллаж байсан ерөнхийлөгч асан Ференц Мадл юм.

Магярын Орбаны үнэнч дэмжигчээс дайсан болох зам хурдан байсан. Хоёр жилийн өмнө тэрбээр эрх баригч "Фидес" намын гишүүн байсан бөгөөд өмнө нь тус намын өсөж буй оддын нэг байсан Жудит Варгатай гэрлэжээ. 

Хосууд Бельгийн Брюссель хотод 10 орчим жил амьдарсан бөгөөд Магяр дипломатч байсан бол Варга Европын Парламентын Фидес намын гишүүний ажилтай байсан. Тэд 2018 онд гурван хүүгийнхээ хамт Будапешт руу буцаж нүүжээ. Дараа жил нь Варга Орбаны хууль зүйн сайдаар томилогдсон бөгөөд 2023 онд Фидес намыг 2024 оны Европын Парламентын сонгуульд оруулахын тулд албан тушаалаасаа буусан. 2024 оны эхээр Фидес намыг цочирдуулсан дуулиан шуугиан энэ бүхнийг баллав. Тухайн үеийн Унгарын ерөнхийлөгч Каталин Новак хүүхдийн асрамжийн газарт насанд хүрээгүй хөвгүүдийг хүчирхийлсэн хэргийг нуун дарагдуулахад тусалсан хэргээр ял шийтгүүлсэн хуучин албан тушаалтныг өршөөсөн юм. Үүнд Орбаны нөлөө их байсан.

Энэ цаг үеэс л Унгарыг олон жил удирдсан Орбаны өрсөлдөгчийг хүмүүс үгүйлэх болсон гэж хэлж болно. 

Тэр жилийн сүүлээр Магяр "Тиса" намд элсэж, хурдан хугацаанд албан тушаал ахиж, намын удирдагч болсон. Түүний удирдлага дор "Тиса" нам 2024 оны зургадугаар сард болсон Европын парламентын сонгуульд Унгарын саналын бараг 30 хувийг авч, Магяр Европын парламентын гишүүн болжээ.

Орбанаас улам бүр залхаж, итгэл үнэмшилтэй сөрөг хүчээр дутагдаж байсан Унгарчуудад улс төрийн боломжит хувилбар энэ байв. Түүнээс хойш тус намын гишүүдийн тоо улам бүр нэмэгджээ. "Tisza" гэдэг нь "хүндэтгэл ба эрх чөлөө" гэсэн утгатай Унгар үгсийн товчлол бөгөөд мөн тус улсын томоохон голын нэр юм. 

Л.Баяр