АНУ-ын Ерөнхийлөгч Доналд Трамп Пакистаны хүсэлтээр АНУ Ирантай гал зогсоох хугацааг сунгаж, Ираны боомтуудыг хаасан хэвээр байх болно гэж мэдэгдэв.

Түүний олон нийтийн сүлжээнд, "Ираны Засгийн газар ноцтой хуваагдмал байгаа нь гэнэтийн зүйл биш. Пакистаны Фельдмаршал Асим Мунир болон Ерөнхий сайд Шехбаз Шариф нарын хүсэлтээр биднээс Ираны удирдагчид болон төлөөлөгчид нэгдсэн санал гаргаж чадах хүртэл Иран руу довтлохоо зогсоохыг хүссэн. Тиймээс би хэлэлцээ аль нэг шийдвэрт хүрэх хүртэл зогсоох хугацааг сунгаж байна" гэжээ. 

Хоёр улсын хэлэлцээр сайн, муу үр дүнд хүрэхээс үл хамаарч гал зогсоох хугацаа сунгагдав. Гэвч одоогоор тодорхой биш байгаа зүйл нь Ираны байр суурь юм. АНУ-ын Ираны боомтуудыг хаасан хориг арга хэмжээ нь нэг талаараа дайны гэмт хэрэг гэж тэд үзэж буй. Энэ нь цаашид хийх аливаа хэлэлцээрт саад тотгор учруулах магадлалтай. 

АНУ болон Ираны хоорондын хэлэлцээрийн үеэр газрын тосны үнийн хувьд тогтворгүй өдөр болох төлөвтэй. Өмнө нь Брент маркийн газрын тосны үнэ 5 хувиас дээш өсч, нэг баррель нь 100 ам.доллараас давсан. Харин Трампын гал зогсоох хугацааг сунгах тухай мэдэгдлийн дараа энэ үнэ одоо 98.97 доллар болж буурсан.

Гэсэн хэдий ч энэ нь дайны өмнөх үе буюу хоёрдугаар сарын сүүлээс 35 хувиар өссөн тоо юм. 

Л.Баяр