Хойд Солонгос улс ОХУ-ын талд тулалдан амь үрэгдсэн цэргүүддээ зориулсан дурсгалын музейг Пёньян хотноо нээлээ. Энэ нь хоёр улсын харилцаа, тэр дундаа цэргийн хамтын ажиллагаа улам гүнзгийрч буйн тод илрэл болж байна.

“Гадаад дахь цэргийн ажиллагааны байлдааны гавьяаны дурсгалын музей”-н нээлтийн ёслол ням гарагт болсон бөгөөд энэ нь Оросын Курскийн хилийн бүсийг Украины довтолгооноос “чөлөөлсөн” ажиллагаа дууссаны нэг жилийн ойтой давхцсан талаар Хойд Солонгосын төрийн мэдлийн KCNA агентлаг мэдээлжээ.

Тус ёслолд Хойд Солонгосын удирдагч Ким Жон Ун оролцсон бөгөөд ОХУ-ын Төрийн Думын дарга Вячеслав Володин, Батлан хамгаалахын сайд Андрей Белоусов зэрэг өндөр албан тушаалтнууд мөн хүрэлцэн ирсэн байна.

Өмнөд Солонгосын тагнуулын байгууллагын тооцоолсноор Хойд Солонгос Оросын Курскийн бүсэд байлдахаар ойролцоогоор 15 мянган цэрэг илгээснээс 2 мянга орчим нь амь үрэгдсэн гэж үзэж байгаа ч Москва болон Пёньян албан ёсны тоо мэдээлэл зарлаагүй байна.

Ёслолын үеэр Ким Жон Ун амь үрэгдсэн нэг цэргийн шарилд шороо цацаж, бусад цэргүүдэд цэцэг өргөсөн бөгөөд дараа нь зочдын дэвтэрт гарын үсэг зуржээ.

Тэрбээр хэлсэн үгэндээ амь үрэгдсэн цэргүүдийг “Солонгосын ард түмний баатарлагийн бэлгэ тэмдэг” хэмээн тодорхойлж, хоёр орны “ялалтын замнал”-ыг дэмжих хүчин болно гэж онцолсон байна. Мөн АНУ болон түүний холбоотнуудыг “ноёрхлын бодлого, цэргийн ажиллагаа” явуулж байна хэмээн буруутгажээ.

Андрей Белоусовтай хийсэн уулзалтын үеэр Ким Жон Ун ОХУ-ын бүрэн эрхт байдал, аюулгүй байдлыг хамгаалах бодлогыг бүрэн дэмжихээ илэрхийлсэн байна. Харин Оросын тал 2027–2031 оныг хамарсан цэргийн хамтын ажиллагааны төлөвлөгөөнд гарын үсэг зурахад бэлэн байгаагаа мэдэгджээ.

ОХУ-ын Ерөнхийлөгч Владимир Путины илгээлтэд энэхүү музей нь “хоёр орны найрамдал, эв нэгдлийн тод бэлгэ тэмдэг” болохыг онцлоод, стратегийн түншлэлийг цаашид улам бэхжүүлэхээ илэрхийлсэн байна.

Шинжээчдийн үзэж байгаагаар, 2022 онд Украинд бүрэн хэмжээний халдлага эхэлснээс хойш Хойд Солонгос гадаад бодлогоо ОХУ руу эрс чиглүүлж, цэрэг болон зэвсэг нийлүүлэхийн хариуд эдийн засгийн дэмжлэг, магадгүй эмзэг технологи авахыг зорьж байна.

Мөн АНУ, Өмнөд Солонгос болон холбоотнууд ОХУ-аас Хойд Солонгост цөмийн болон пуужингийн хөтөлбөрийг нь дэмжих дэвшилтэт технологи шилжиж болзошгүйд болгоомжилж байна.

Цэргийн шинжээчдийн дүгнэлтээр, Хойд Солонгосын цэргүүд эхэндээ байлдааны туршлага дутмаг, газар нутгийн онцлогийг мэдэхгүйгээс ихээхэн хохирол амссан ч цаашид туршлагажиж, Оросын армид чухал үүрэг гүйцэтгэх болсон байна.

Т.Зузу