Атлантын далайд аялж явсан аяллын хөлөг онгоц дээр хантавирусын сэжигтэй дэгдэлт гарч, гурван хүн нас барсан талаар Дэлхийн эрүүл мэндийн байгууллага мэдээллээ.

Тодруулбал, Аргентинаас хөдөлж Кабо Верде чиглэлд зорчиж явсан “MV Hondius” нэртэй аяллын хөлөг дээр халдварын тохиолдлууд бүртгэгдсэн байна. Урьдчилсан мэдээллээр нийт 6 хүн халдвар авсан байж болзошгүй бөгөөд үүнээс нэг тохиолдол лабораториор батлагдсан, үлдсэн нь сэжигтэй ангилалд багтаж байгаа аж.

Халдвар авсан хүмүүсийн дунд гурван хүн нас барж, нэг өвчтөн Өмнөд Африкт эрчимт эмчилгээ хийлгэж байгаа бол бусад зорчигч, багийн гишүүдийг эмнэлгийн хяналтад авчээ.

Хантавирус нь ихэвчлэн мэрэгч амьтдын (хулгана, харх зэрэг) шээс, өтгөн, шүлсээр дамжин хүнд халдварладаг вирус юм. Ховор тохиолдолд хүнээс хүнд дамжих боломжтой гэж үздэг. Өвчний эхний шинж тэмдэгт өндөр халуурах, булчин өвдөх, ядрах зэрэг ордог бөгөөд хүндэрсэн үед амьсгалын дутагдалд орж, амь насанд аюул учруулж болзошгүй.

Одоогоор Дэлхийн эрүүл мэндийн байгууллага болон холбогдох байгууллагууд халдварын эх үүсвэрийг тогтоох, ойрын хавьтлуудыг илрүүлэх, лабораторийн шинжилгээг өргөжүүлэх чиглэлээр ажиллаж байна. Мөн уг хөлөг дээрх нөхцөл байдлыг нарийвчлан судалж, цаашдын тархалтаас сэргийлэх арга хэмжээг авч эхэлжээ. Аяллын хөлөг дээр гарсан энэхүү дэгдэлт нь хантавирус далайн аялалтай холбоотойгоор илэрсэн ховор тохиолдлын нэг бөгөөд олон улсын эрүүл мэндийн байгууллагууд анхааралтай ажиглаж байна.

Л.Баяр