Их Британийн шүүх Хонконгийн ардчиллыг дэмжигч идэвхтнүүдийг мөрдөн тагнасан хэрэгт хоёр хүнийг буруутай гэж үзжээ. Тэднийг Хятадтай холбоотой тагнуулын ажиллагаанд оролцсон гэж прокурорууд мэдэгдсэн байна.

Лондонгийн Олд Бэйли шүүхээс 65 настай Чунг Биу “Билл” Юэн болон 40 настай Чи Люн “Питер” Вай нарыг “гадаадын тагнуулын албанд тусалсан” хэрэгт буруутай гэж үзсэн байна. Тэд 2023 оны сүүлээс 2024 оны тавдугаар сар хүртэл Их Британид оршин суудаг Хонконгийн ардчиллыг дэмжигч иргэдийг мөрдөж, мэдээлэл цуглуулж байсан аж.

Питер Вай нь Их Британийн Хилийн албанд ажиллаж байсан бөгөөд төрийн мэдээллийн санд хууль бусаар нэвтэрч, идэвхтнүүдийн хувийн мэдээллийг шалгасан нь тогтоогджээ. Харин Билл Юэн нь Лондон дахь Хонконгийн Эдийн засаг, худалдааны төлөөлөгчийн газарт ажиллаж байсан бөгөөд ажиллагааг зохион байгуулсан гэж үзэж байна.

Шүүхийн үеэр тэд Хонконгийн нэрт ардчиллын төлөө тэмцэгч Нэтан Лау зэрэг хүмүүсийг мөрдөж байсан тухай баримтууд дэлгэгдсэн байна. Мөн Британийн парламентын зарим гишүүд хүртэл тэдний ажиглалтад өртсөн байж болзошгүй талаар мэдээлжээ.

Энэ хэрэг нь Их Британид Хятадын талд тагнуул хийсэн анхны ял шийтгэлүүдийн нэг болж байгаа бөгөөд Лондон, Бээжингийн харилцаанд шинэ хурцадмал байдал үүсгэж байна. Их Британийн Засгийн газар уг шийдвэрийн дараа Хятадын Элчин сайдыг дуудаж, “Британийн газар нутаг дээрх ийм ажиллагааг тэвчихгүй” хэмээн мэдэгдсэн байна. Харин Лондон дахь Хятадын Элчин сайдын яам уг хэргийг “улс төрийн зорилготой зохиомол хэрэг” хэмээн няцаажээ. Шүүхээс хоёр этгээдэд оноох ялыг дараа нь хэлэлцэх бөгөөд тэд 14 хүртэл жилийн хорих ял сонсох магадлалтай байна.

Л.Баяр