Их Британийн хааны гэр бүлийн гишүүн, Уэльсийн гүнж Кэтрин хорт хавдрын эмчилгээ хийлгэснээсээ хойш анхны албан ёсны гадаад айлчлалаа хийхээр болжээ. Тэрбээр энэ долоо хоногт Италийн Режжо Эмилия хотод хоёр өдрийн ганцаарчилсан ажлын айлчлал хийх талаар Кенсингтоны ордон мэдээлсэн байна.
Энэхүү айлчлал нь Кэтриний олон нийтийн ажилдаа эргэн ирж буй хамгийн чухал алхмуудын нэг гэж олон нийт үзэж буй. Тэрбээр 2024 онд хорт хавдартай гэдгээ олон нийтэд мэдэгдэж, эмчилгээ хийлгэж байсан бөгөөд энэ оны эхээр өвчин нь намжсан талаар мэдээлсэн юм.
Кэтрин Италид байх хугацаандаа бага насны хүүхдийн хөгжлийн чиглэлээр дэлхийд алдартай “Режжо Эмилия” боловсролын арга барилтай танилцах юм. Энэхүү аргачлал нь хүүхдийн сэтгэхүй, бүтээлч байдал, орчинтойгоо харилцах чадварыг хөгжүүлэхэд чиглэдэг бөгөөд Кэтриний олон жилийн турш голлон ажиллаж ирсэн салбарын нэг ажээ.
Түүний байгуулсан “Royal Foundation Centre for Early Childhood” төв нь бага насны хүүхдийн хөгжил, сэтгэлзүйн эрүүл мэндийн асуудалд анхаарал хандуулах зорилготой бөгөөд энэ удаагийн айлчлал нь тус байгууллагын ажлыг олон улсын түвшинд өргөжүүлэх эхлэл гэж Кенсингтоны ордон тодорхойлсон байна.
Мөн энэ айлчлал Кэтриний хувьд хувийн дурсамжтай холбоотой аж. Тэрбээр 2000 онд сургуулиа төгссөний дараах завсар жилдээ Флоренц хотод амьдарч, итали хэл болон урлагийн түүх судалж байсан байна. Тиймээс Италид эргэн ирэх нь түүнд “аз жаргалтай дурсамжууд”-ыг санагдуулж байгаа талаар хааны ордны ойрын эх сурвалжууд мэдээлжээ.
Тэрбээр сүүлийн саруудад Уимблдон, хааны цэцэрлэгийн хүлээн авалт зэрэг олон нийтийн арга хэмжээнд дахин оролцож эхэлсэн бөгөөд энэ удаагийн Итали дахь айлчлал нь түүний эргэн ирэлтийн хамгийн том алхамуудын нэг боллоо.
Л.Баяр
