Энэтхэгийн Мумбай хотод нэг гэр бүлийн дөрвөн гишүүн нас барсан нууцлаг хэрэг гарснаас хойш бараг гурван долоо хоног өнгөрсөн ч мөрдөн байцаагчид яг юу болсон талаар одоо хүртэл тодорхой хариулт олж чадаагүй байна.

Абдулла Докадиа, түүний эхнэр Насрин болон хоёр охин Айеша, Зайнаб нарын цогцсыг дөрөвдүгээр сарын 25-нд Мумбай хотын Пайдхони дүүрэг дэх гэрээс нь олжээ. Энэ хэрэг ил болсны дараа Энэтхэгийн хэвлэлүүд уг явдлыг “тарвасны үхэл” хэмээн нэрлэжээ. Учир нь нас барахаасаа өмнө тэд гэр бүлээрээ хамгийн сүүлд тарвас идсэн нь олны анхаарлыг татсан юм. 

Хэвлэлүүдэд тэдний талаар мэдээлэхдээ тарвасаар эсвэл химийн бодисоор бохирдсон байж болзошгүй тухай мэдээллүүд цацагдаж, олон янзын таамгууд гарлаа. Мумбай хотын жимсний захуудад тарвасны эрэлт огцом буурч, үнэ нь хүртэл унасан байна.

Мөн энэ хэрэг санамсаргүй осол байсан уу, эсвэл зориуд үйлдсэн хэрэг үү гэсэн асуулт олон нийтийн дунд хүчтэй өрнөжээ. Өнгөрсөн долоо хоногт Мумбайн цагдаа нар шүүх шинжилгээний дүгнэлтээр Докадиагийн гэр бүлийг цайрын фосфид гэх маш хортой бодис хөнөөсөн болохыг мэдээлсэн байна. Уг бодис нь ихэвчлэн харх устгахад хэрэглэгддэг хор аж. Шинжээчдийн мэдээлснээр, нас барагсдын элэг, бөөр, дэлүү зэрэг эрхтнээс, мөн идсэн тарвасны үлдэгдлээс цайрын фосфид илэрсэн байна.

Гэсэн ч хэргийн учиг одоо хүртэл бүрэн тайлагдаагүй хэвээр байгаа бөгөөд олон асуулт хариултгүй үлджээ. Лхагва гарагт Мумбайн цагдаагийнхан, “Бид бүх өнцгөөс нь шалгаж, нотлох баримт цуглуулсаар байна. Хүн амины хэрэг, санамсаргүй хордлого эсвэл амиа хорлолт гэсэн аль ч хувилбарыг үгүйсгээгүй” гэжээ.

Докадиагийн гэр бүл Мумбай хотын өмнөд хэсгийн хуучин барилгын нэгдүгээр давхарт амьдардаг байсан аж. Тэд нас барахынхаа өмнөх орой гэр бүлийнхэн төрөл төрөгсдөө оройн хоолонд урьж, бириани буюу мах, халуун ногоотой будаатай хоол идсэн байна.

Зочид оройн 22:30 цагийн үед явсны дараа гэр бүлийнхэн тарвас иджээ. Үүний дараахан бүгд бие нь муудаж эхэлсэн гэнэ. “Тэд бүгд бөөлжиж, суулгаж эхэлсэн. Эхлээд ойролцоох эмнэлэгт хүргэгдэж, дараа нь сэхээн амьдруулах тасаг руу шилжүүлсэн ч харамсалтай нь дөрвүүлээ нас барсан” гэж цагдаагийн дэд комиссар Правин Мундхе хэвлэлд ярьжээ.

Тэдний бие муудсан тухай мэдээг сонссон хөршүүд нь туслахаар яаран ирсэн бөгөөд тэдний нэг, дөрөвдүгээр давхарт амьдардаг эмч Заид Куреши хамгийн бага охинд анхны тусламж үзүүлсэн байна. “Тэр амьсгалахад хүндрэлтэй байсан тул би CPR хийсэн. Гэвч байдал нь дээрдээгүй учраас эмнэлэг рүү хүргэсэн. Харамсалтай нь удалгүй нас барсан” гэж тэр "BBC Marathi"-д ярьжээ.

Бусад гурван хүнийг ч мөн өөр эмнэлэг рүү шилжүүлсэн ч бүгд нас барсан байна. Тэдний задлан шинжилгээний эцсийн дүгнэлт одоо хүртэл гараагүй байгаа аж. Мөрдөн шалгах ажиллагааны хүрээнд цагдаа нар тарвасны хальс зэрэг бүх хүнсний үлдэгдлийг хураан авч шинжилгээнд өгсөн байна.

Шүүх шинжилгээний лабораторийн захирал доктор Вижай Такарегийн хэлснээр, цайрын фосфид нь нас барагсдын ходоодны агууламж, цөс, хэвлийн өөхөн давхаргаас ч мөн илэрчээ. Мөн уг хорт бодис зөвхөн тарвасны дээжээс илэрсэн бөгөөд бусад хоолноос илрээгүй болохыг мөрдөгчид онцолсон байна. 

         Энэтхэгийн “Indian Express” сонинд мэдээлснээр, тус гэр бүлийн амьдардаг барилгад хархны асуудал их байдаг бөгөөд оршин суугчид нь хор, наалддаг хавтан зэрэг хэрэгсэл тогтмол ашигладаг аж.

Л.Баяр