Доналд Трамп БНХАУ-д хийж буй төрийн айлчлалынхаа үеэр Ши Жиньпинтэй Бээжин хотноо өндөр түвшний уулзалт хийлээ. Энэхүү уулзалт нь худалдаа, Тайвань, Иран дахь дайн болон хиймэл оюун ухаан зэрэг дэлхийн анхаарлын төвд буй асуудлуудыг хамарсан томоохон дипломат үйл явдал болж байна.

Хятадын талын мэдээлснээр, Ши Жиньпин уулзалтын үеэр Тайванийн асуудлыг “АНУ-Хятадын харилцааны хамгийн чухал сэдэв” хэмээн онцолжээ. Тэрбээр энэ асуудлыг буруу зохицуулбал хоёр улс “мөргөлдөөн, бүр зэвсэгт сөргөлдөөнд хүрч болзошгүй” гэж анхааруулсан байна.

Харин Доналд Трамп Ши Жиньпинийг “агуу удирдагч” хэмээн магтаж, АНУ ба Хятадын харилцаа “урьд өмнөхөөсөө илүү сайн болно” гэж мэдэгдэв. Уулзалтын үеэр тэр өөртэй нь хамт очсон Америкийн томоохон бизнес эрхлэгчдийг Хятадын талд танилцуулжээ.

Мөн хоёр тал Ирантай холбоотой нөхцөл байдлыг хэлэлцсэн байна. АНУ Хятадыг Ираны асуудлыг зохицуулахад илүү идэвхтэй оролцохыг хүсэж байгаа бөгөөд Ормузын хоолой нээлттэй байх ёстой гэдэг дээр санал нэгдсэн гэж Цагаан ордон мэдээлэв.

Худалдааны салбарт Хятад улс Америкийн газрын тос, хөдөө аж ахуйн бүтээгдэхүүн болон нисэх онгоц худалдан авах сонирхлоо илэрхийлжээ. Түүнчлэн хоёр улсын эдийн засгийн хамтын ажиллагааг өргөжүүлэх, худалдааны маргаанаас зайлсхийх шинэ механизм байгуулах талаар ярилцсан байна. Трампын айлчлалын үеэр Бээжинд ёслол хүндэтгэлтэй арга хэмжээнүүд болсон бөгөөд хоёр удирдагч Тяньаньмэний талбай дахь Ардын их хурлын ордонд уулзсаны дараа Хятадын алдарт Тэнгэрийн сүмийн цогцолборт хамт очсон байна.

Л.Баяр