АНУ-ын Харвардын их сургуулийн багш нар бакалаврын түвшний оюутнуудад олгодог “A” дүнгийн тоог хязгаарлах шийдвэрийг санал хураалтаар баталлаа. Энэ нь их сургуулийн хэмжээнд өсөн нэмэгдэж буй дүнгийн хэт хөөрөгдлийг (grade inflation) бууруулах зорилготой томоохон шинэчлэл юм.

Шинэ журмын дагуу 2027 оны намраас эхлэн нэг хичээл дээр нийт оюутнуудын дээд тал нь 20 хувь нь л “A” дүн авах боломжтой байх бөгөөд үүн дээр нэмээд жижиг ангиудад дөрвөн “A” хүртэл нэмэлтээр олгож болох юм.

Энэхүү санал нь Харвардын Урлаг, шинжлэх ухааны факультетийн багш нарын цахим санал хураалтаар батлагдсан бөгөөд 458 багш дэмжиж, 201 нь эсэргүүцсэн байна. Ойролцоогоор нийт санал өгсөн багш нарын 70 хувь нь дэмжжээ. Мөн уг шинэчлэл нь зөвхөн “A” дүнг хязгаарлаж байгаа бөгөөд “A-” болон бусад доод дүнг хязгаарлахгүй юм.

Харвардын удирдлагын мэдээлснээр, сүүлийн жилүүдэд оюутнуудын 60 гаруй хувь нь “A” ангиллын дүн авч байсан нь эрдмийн үнэлгээний утга агуулгыг сулруулж байна гэж үзжээ. Тиймээс энэ өөрчлөлт нь “жинхэнэ академик амжилтыг илүү тод ялгах” зорилготой гэж тайлбарласан байна.

Шинэ журам нь мөн оюутны дотоод шагнал, тэтгэлэг, алдар хүндийн үнэлгээнд GPA-ийн оронд “дунджаар хувийн байр (percentile rank)” ашиглах шинэ системийг нэвтрүүлэхээр болжээ. Энэхүү өөрчлөлтийг зарим багш нар академик чанарыг сайжруулах зөв алхам гэж үзэж байгаа бол олон оюутнууд илүү их өрсөлдөөн, дарамт үүснэ гэж шүүмжилж байна.

Л.Баяр