АНУ-ын тагнуулын байгууллагуудын үнэлгээгээр Иран улс сүүлийн дайралтуудын дараа цэргийн үйлдвэрлэлийн хүчин чадлаа таамаглаж байснаас илүү хурдан сэргээж эхэлсэн талаар CNN мэдээлжээ.

Тус мэдээлэлд дурдсанаар, дөрөвдүгээр сарын эхээр эхэлсэн зургаан долоо хоногийн гал зогсоох хугацааны үеэр Иран зарим төрлийн дроны үйлдвэрлэлээ аль хэдийн дахин эхлүүлсэн байна. АНУ-ын тагнуулын хэд хэдэн эх сурвалжийн үзэж буйгаар Тегераны цэрэг-аж үйлдвэрийн сэргээн босголт “хүлээлтээс хавьгүй хурдан” өрнөж байгаа аж.

АНУ болон Израилын хамтарсан ажиллагааны үеэр Ираны пуужин, дрон үйлдвэрлэлийн байгууламжууд, цэргийн баазууд ихээхэн хохирол амссан гэж мэдээлж байсан. Гэвч шинэ үнэлгээнээс харахад Иран богино хугацаанд үйлдвэрлэлийн зарим шугамаа сэргээж, цэргийн чадамжаа дахин бүрдүүлэхээр ажиллаж байгаа бололтой.

CNN-ийн мэдээлснээр энэ нөхцөл байдал нь АНУ-ын Ерөнхийлөгч Д.Трампын засаг захиргаанд шинэ сорилт үүсгэж магадгүй байна. Трамп Иран энхийн хэлэлцээрт хүрэхгүй бол дахин цохилт өгөхөд бэлэн гэж анхааруулсан ч дипломат гарц хайх хугацаа олгоно гэдгээ мөн мэдэгдээд байгаа.

Шинжээчдийн үзэж буйгаар, Ираны цэрэг-аж үйлдвэрийн системийг бүрэн саармагжуулах нь урт хугацааны бөгөөд өндөр өртөгтэй ажиллагаа болохыг энэхүү сэргэлт харуулж байна.

Л.Баяр