Бүгд Найрамдах Конго улсын зүүн хэсэгт Эболагийн халдварын улмаас үүссэн бухимдал хурцдаж, эсэргүүцэгчид эмчилгээний төвийг галдан шатаасан байна. Тодруулбал, Итури мужийн Рвампара хотод Эболагийн сэжигтэй тохиолдлоор нас барсан орон нутгийн нэгэн хөлбөмбөгчний ар гэрийнхэн цогцсыг нь уламжлалт ёсоор оршуулахыг шаардсан байна. Харин эрүүл мэндийн байгууллагууд халдвар тархахаас сэргийлж “аюулгүй оршуулгын журам” мөрдөх ёстой гэж үзэн цогцсыг өгөхөөс татгалзжээ.

Үүний дараа олон хүн эмнэлгийн гадна цугларч, Эболагийн өвчтөнүүдийг тусгаарлан эмчилж байсан майхан, эмчилгээний хэсгүүдийг галдан шатаасан байна. Цагдаа нар олныг тараахаар анхааруулах буудлага хийж, нулимс асгаруулагч хий ашигласан гэж гэрчүүд мэдээлжээ.

Албаныхны мэдээлснээр, галын улмаас эмчилгээний хоёр майхан шатаж, зарим өвчтөнүүдийг яаралтай өөр газар шилжүүлсэн байна. Мөн оршуулахаар бэлтгэж байсан нэг цогцос галд өртсөн талаар Reuters мэдээлжээ.

Дэлхийн Эрүүл Мэндийн Байгууллага энэ удаагийн Эболагийн дэгдэлтийг “олон улсын хэмжээний онцгой байдал” гэж зарласан бөгөөд халдвар БНКонгоос хөрш Уганда руу тархаад байна. Одоогоор 600 гаруй сэжигтэй тохиолдол бүртгэгдэж, 130-160 орчим хүн нас барсан гэх урьдчилсан мэдээлэл гарчээ.

Шинжээчдийн үзэж буйгаар, зэвсэгт мөргөлдөөн, эмнэлгийн хомс нөөц, олон нийтийн үл итгэх байдал нь халдварыг тогтоон барих ажлыг улам хүндрүүлж байна. Ялангуяа одоо тархаж буй "Bundibugyo" төрлийн Эболад батлагдсан вакцин байхгүй нь дэлхий нийтийн санааг зовоож байгаа аж.

Л.Баяр