АНУ-ын Ерөнхийлөгч Доналд Трамп Польш улсад нэмэлт 5000 америк цэрэг илгээх шийдвэр гаргаснаа мэдэгдлээ. Энэ нь өмнө нь Пентагоноос төлөвлөж байсан 4000 цэргийн байршлыг цуцалснаас ердөө нэг долоо хоногийн дараах үйл явдал юм.
Трамп өөрийн Truth Social хуудсаар дамжуулан мэдээлэхдээ уг шийдвэр нь Польшийн Ерөнхийлөгч Кароль Навроцкитай тогтоосон харилцаатай холбоотой гэж онцолсон бөгөөд тэрбээр Навроцкийг өнгөрсөн жилийн ерөнхийлөгчийн сонгуулийн үеэр дэмжиж байсан юм. Гэвч нэмэлт цэргүүд өмнөх төлөвлөгөөний нэг хэсэг үү, эсвэл тусдаа ажиллагаа юу гэдэг нь тодорхойгүй хэвээр байна.
Цагаан ордон сүүлийн саруудад “America First” бодлогын хүрээнд Европ дахь нийт цэргийн тоог бууруулах чиг баримтлалтай байгаагаа илэрхийлсэн. Үүнтэй холбоотойгоор АНУ энэ сарын эхээр Германд байрлаж буй 5000 цэргээ татан гаргахаар болсныг мөн зарласан бөгөөд энэ шийдвэр нь Трамп болон Германы Канцлер Фридрих Мерцийн Ираны дайны асуудлаарх маргаантай холбоотой гэж мэдээлэгдэж байна.
Түүнчлэн Трамп НАТО-гийн холбоотнуудыг АНУ-тай хамтран Ираны эсрэг дарамт үзүүлэхэд хангалттай оролцохгүй байна хэмээн шүүмжилсээр иржээ. НАТО-гийн гишүүн орнуудын Гадаад хэргийн сайд нарын уулзалт Баасан гарагт Шведэд болох бөгөөд АНУ-ын Төрийн нарийн бичгийн дарга Марко Рубио оролцох юм.
АНУ Германд байрлах 36 мянга гаруй цэргээрээ Европ дахь хамгийн том цэргийн хүчийг төвлөрүүлсэн бол Итали улсад 12 мянга орчим, Их Британид 10 мянга орчим цэрэг байрлаж байна. Польш дахь шинэ нэмэгдэл хүч энэ бүс нутаг дахь АНУ-ын цэргийн бодлогын өөрчлөлтийн нэг хэсэг болох эсэх нь тодорхойгүй хэвээр байна.
Л.Баяр
