АНУ-ын Иргэншил, Цагаачлалын алба (USCIS) 2026 оны тавдугаар сарын 22-нд шинэ заавар гаргаж, байнгын оршин суух эрх буюу “green card” хүсэгчдийн ихэнх нь АНУ дотор статусаа өөрчлөх боломжгүй болж, эх орондоо буцан консулын журмаар өргөдөл гаргах шаардлагатай болохыг мэдэгдлээ.
Шинэ журмын дагуу АНУ-д түр визээр ажиллаж, суралцаж болон амьдарч буй гадаад иргэд green card хүсвэл ихэнх тохиолдолд АНУ-аас гарч, өөрийн эх орондоо очиж өргөдлөө гаргах ёстой болж байна. Өмнө нь өргөн хэрэглэгддэг байсан “АНУ дотор статус өөрчлөх” боломжийг зөвхөн онцгой тохиолдолд зөвшөөрөхөөр хязгаарлажээ.
Мөн цаашид байнгын оршин суух хүсэлтийг АНУ-ын Элчин сайдын яам, консулын газраар дамжуулан шийдвэрлэх буюу “consular processing” хэлбэрт төвлөрүүлэхээр болсон байна. Мэргэжилтнүүдийн тооцоогоор энэ өөрчлөлт нь АНУ-д амьдарч буй сая гаруй түр визтэй гадаад иргэдэд нөлөөлж, гэр бүл салалт, ажил эрхлэлт болон цагаачлалын процессын хугацаанд тодорхой хүндрэл үүсгэж болзошгүй гэж анхааруулж байна.
АНУ-ын Дотоодын Аюулгүй байдлын яам (DHS) болон USCIS энэ шийдвэрийг цагаачлалын тогтолцоог илүү хяналттай, хууль ёсны дагуу хэрэгжүүлэх, дотоодын системийн ачааллыг бууруулах зорилготой гэж тайлбарласан байна.
Гэсэн хэдий ч хүний эрхийн байгууллагууд уг бодлогыг шүүмжилж, гэр бүлүүдийг салгах эрсдэлтэй, эмзэг бүлгийн иргэдэд сөрөг нөлөө үзүүлж болзошгүй хэмээн байр сууриа илэрхийлжээ.
Л.Баяр
