АНУ болон Ираны хоорондын хурцадмал байдал Ойрх Дорнодын бүс нутагт үргэлжилж, дэлхийн эрчим хүчний зах зээл болон олон улсын тээвэрлэлтийн аюулгүй байдалд нөлөөлсөн хэвээр байна. Ялангуяа дэлхийн нефтийн нийлүүлэлтийн чухал гарц болох Ормузын хоолойн нөхцөл байдал олон улсын анхаарлын төвд байна.
Reuters агентлагийн мэдээлснээр АНУ-ын Ерөнхийлөгч Дональд Трамп Ирантай хийх энхийн хэлэлцээр “тохиролцоонд хүрсэн” гэж мэдэгдсэн боловч Ираны тал уг мэдээллийг няцааж, Ормузын хоолойн хяналтыг хадгална гэж мэдэгдсэн байна.
Ираны парламентын дарга бөгөөд хэлэлцээний ахлах төлөөлөгч Мохаммад Багер Калибаф “АНУ-тай хийх хэлэлцээнд Иран буулт хийхгүй” гэж мэдэгдэж, Тегеран үндэсний аюулгүй байдал болон бүс нутгийн ашиг сонирхлоо хамгаална гэдгээ онцолжээ.
Ормузын хоолой нь дэлхийн нефтийн нийлүүлэлтийн томоохон хэсгийг дамжуулдаг стратегийн бүс бөгөөд сүүлийн саруудад бүс нутгийн цэргийн ажиллагаа, тээврийн хязгаарлалт, аюулгүй байдлын эрсдэл нэмэгдсэнтэй холбоотойгоор нефтийн үнэ савлаж байна. Reuters-ийн мэдээлснээр Иран тус бүсэд хяналтаа нэмэгдүүлж, зарим хөлөг онгоцонд нэмэлт шалгалт болон тусгай зөвшөөрлийн тогтолцоо хэрэгжүүлж эхэлжээ.
Мөн олон улсын зуучлалын хүрээнд Пакистан, Катар зэрэг орнууд АНУ болон Ираны талуудын хооронд хэлэлцээ зохион байгуулах чиглэлээр ажиллаж байгаа талаар зарим эх сурвалжууд мэдээлж байна.
Шинжээчдийн үзэж буйгаар хэрэв ормузын хоолойн асуудал удаан үргэлжилбэл дэлхийн нефть, шатахууны үнэ өсөхөөс гадна олон улсын худалдаа, нийлүүлэлтийн сүлжээнд сөрөг нөлөө үзүүлэх эрсдэлтэй байна.
