Хятадын хойд нутгийн Шаньси муж дахь нүүрсний уурхайд болсон хүчтэй хийн дэлбэрэлтийн улмаас олон уурхайчин амиа алдав. Энэ нь тус улсын сүүлийн 17 жилийн түүхэн дэх хамгийн ноцтой уурхайн ослын нэгд тооцогдов.

Осол Шаньси мужийн Циньюань тойрогт байрлах Люшэнью нүүрсний уурхайд орон нутгийн цагаар баасан гаргийн орой болсон бөгөөд тухайн үед уурхайн гүнд 247 ажилтан ажиллаж байжээ. Эхний мэдээллээр нүүрстөрөгчийн дутуу ислийн хэмжээ аюултай түвшинд хүрсний дараа дэлбэрэлт болсон гэж мэдээлсэн байна.

Ослын улмаас дор хаяж 82 хүн амиа алдаж, 120 гаруй хүн эмнэлэгт хүргэгдсэн бөгөөд зарим нь хүнд байдалтай байгаа аж. Аврах ажиллагаанд 755 гаруй аврагч, эмнэлгийн ажилтан оролцож, уурхайн дотор үлдсэн хүмүүсийг эрэн хайх ажиллагаа үргэлжилжээ.

       Уурхайг “Shanxi Tongzhou” групп ажиллуулдаг бөгөөд ослын шалтгааныг мөрдөн шалгаж эхэлсэн байна. Урьдчилсан шалгалтаар уурхайн үйл ажиллагаанд “ноцтой хууль зөрчсөн” байж болзошгүй нөхцөл илэрсэн талаар эрх баригчид мэдээлжээ. Компанийн зарим удирдах албан тушаалтныг саатуулсан байна.

Хятадын Ерөнхийлөгч Ши Жиньпин гэмтсэн хүмүүст эмчилгээ үзүүлэх, аврах ажиллагааг эрчимжүүлэхийг үүрэг болгож, ослын шалтгааныг бүрэн тогтоон буруутай этгээдүүдэд хатуу хариуцлага тооцохыг шаарджээ. Ерөнхий сайд Ли Цян мөн мэдээллийг ил тод хүргэж, хөдөлмөрийн аюулгүй байдлыг чангатгахыг онцолсон байна.

Хятад улс сүүлийн жилүүдэд уурхайн ослыг бууруулах чиглэлд хатуу зохицуулалт хэрэгжүүлж байгаа ч нүүрсний үйлдвэрлэлийн гол бүсүүдэд ийнхүү томоохон осол гарсаар байгаа нь аюулгүй байдлын асуудал бүрэн шийдэгдээгүйг дахин харууллаа.

Л.Баяр