Иран болон АНУ-ын хоорондын дипломат яриа хэлэлцээ өрнөж байгаа энэ үед АНУ Ираны нутаг дахь цэргийн объектуудад дахин цохилт өгсөн талаар албаныхан мэдээлэв.

АНУ-ын талын мэдээлснээр, Ираны өмнөд хэсгийн Бандар-Аббас орчимд байрлах нисгэгчгүй төхөөрөмжийн удирдлагын байгууламжийг онилсон бөгөөд Ормузын хоолойн ойролцоо илэрсэн дөрвөн довтолгооны дроныг устгасан байна. Вашингтон эдгээр ажиллагааг “хамгаалалтын шинжтэй” гэж тайлбарлаж, АНУ-ын цэрэг болон олон улсын худалдааны усан замд аюул учруулж болзошгүй байсан тул урьдчилсан хамгаалалт хэлбэрээр довтолсон гэж тайлбарлажээ. 

Харин Ираны тал АНУ-ын шинэ довтолгоог гал зогсоох тохиролцоог зөрчсөн, “муу санааны илрэл” гэж буруутгасан байна. Тегеран шаардлагатай бол хариу арга хэмжээ авна гэдгээ мөн анхааруулжээ. Үүний зэрэгцээ дипломат шугамаар энхийн хэлэлцээ үргэлжилж байна. Ираны төрийн телевиз АНУ болон Ираны хооронд мөргөлдөөнийг намжаах төсөл хэлбэрийн санамж бичиг боловсруулагдсан гэж мэдээлсэн бөгөөд хэрэв тохиролцоо хэрэгжвэл Ормузын хоолойн тээвэрлэлт дахин хэвийн болж, бүс дэх цэргийн хурцадмал байдал буурах боломжтой гэжээ. Гэвч Цагаан ордон уг мэдээллийг “зохиомол” хэмээн няцаасан байна.

АНУ-ын Ерөнхийлөгч Дональд Трамп Ираныг хэлэлцээг санаатайгаар сунгаж, улс төрийн нөхцөл өөрчлөгдөхийг хүлээж байна гэж буруутгасан бөгөөд “сайн гэрээ” хийх хүсэлтэй ч шаардлага хангахгүй бол цэргийн хувилбар нээлттэй хэвээр гэдгийг онцолжээ. АНУ-ын Төрийн нарийн бичгийн дарга Марко Рубио хэлэлцээнд “тодорхой ахиц” гарч байгаа ч асуудал бүрэн шийдэгдээгүй гэж мэдэгдсэн байна.

Энэхүү мөргөлдөөн болон Ормузын хоолойн асуудал нь дэлхийн газрын тосны нийлүүлэлт, бүс нутгийн аюулгүй байдалд хүчтэй нөлөөлсөн хэвээр байна. 

Л.Баяр