Умард Ирландын нийслэл Белфаст хотод зургаадугаар сарын 8-ны орой болсон ноцтой хутганы халдлага улс даяар түгшүүр төрүүлж, улмаар цагаачлалын эсрэг жагсаал, эмх замбараагүй байдал дэгдэхэд хүргэжээ. Цагдаагийн мэдээлснээр, Белфастын хойд хэсгийн Киннэйрд Авенюд орон нутгийн цагаар 22:30 цагийн орчимд нэгэн эрэгтэй өөр нэг эрэгтэй рүү хутгаар халдсан байна. Хохирогч нь 40 гаруй насны бөгөөд нүүр, нүд, хүзүү болон нуруундаа хүнд шарх авч эмнэлэгт хүргэгдэн биеийн байдал нь хүнд байгаа аж.

Олон нийтийн сүлжээнд тарсан бичлэгт халдагч этгээд хохирогчийг газар дарж байгаад олон удаа хутгалж буй дүрс бичигдсэн бөгөөд орон нутгийн иргэд эр зориг гарган хөндлөнгөөс оролцож, халдлагыг зогсоохыг оролдсон байна. Цагдаа нар хэргийн газарт ирэх хүртэл хэд хэдэн хүн сэжигтнийг тогтоон барьжээ.

Умард Ирландын Цагдаагийн алба (PSNI) 30 орчим настай Судан гаралтай эрэгтэйг баривчилж, хүн амины хэрэг үйлдэхийг завдсан гэх үндэслэлээр яллагдагчаар татсан байна. Тэрээр 2023 онд Их Британид оршин суух зөвшөөрөл авсан байсан гэж албаныхан мэдээлжээ. Одоогоор халдлагын шалтгаан, сэдлийг тогтоох мөрдөн шалгах ажиллагаа үргэлжилж байгаа бөгөөд цагдаа нар уг хэргийг терроризмтой холбоотой гэж үзэх үндэслэл олдоогүй гэж мэдэгдсэн байна.

Их Британийн Ерөнхий сайд Кеир Стармер уг халдлагыг “аймшигтай, жигшүүрт хэрэг” хэмээн буруушааж, хохирогчид туслахаар аюул руу зориглон орсон иргэдэд талархал илэрхийлжээ.

Харин халдлагын дараа Белфаст болон бусад хотод цагаачлалын эсрэг жагсаал өрнөж, зарим нь хүчирхийлэлд шилжсэн байна. Эсэргүүцэгчид автобус шатаах, автомашин эвдэх зэрэг үйлдэл гаргасны улмаас цагдаа нар нэмэлт хүч гарган ажиллаж, иргэдийг худал мэдээлэл түгээхгүй байхыг уриалжээ. Умард Ирландын гол улс төрийн намууд хамтарсан мэдэгдэл гаргаж, халдлагыг эрс буруушаан, хуулийн байгууллагуудад мөрдөн шалгах ажлаа тайван явуулах боломж олгохыг олон нийтээс хүссэн байна.

Л.Баяр