Өмнөд Солонгосын шүүх экс Ерөнхийлөгч Юн Сок Ёлдоо 2024 онд Хойд Солонгосын нийслэл Пхеньян руу дрон илгээсэн ажиллагаатай холбоотой хэргээр 30 жилийн хорих ял оноосон байна. Шүүх түүнийг төрийн өндөр албан тушаалаа урвуулан ашигласан, мөн дайсанд тусалсан үйл ажиллагаанд оролцсон гэж үзжээ.

Сөүлийн төв дүүргийн шүүхийн шийдвэрт дурдсанаар, уг ажиллагаанд тухайн үеийн Батлан хамгаалахын сайд асан Ким Ён Хён мөн холбогдсон бөгөөд тэднийг хамтран улсын аюулгүй байдлыг эрсдэлд оруулсан үйлдэл хийсэн гэж буруутгасан байна. Шүүхийн тайлбарласнаар тэд Хойд Солонгосыг өдөөн хатгаж, цэргийн хурцадмал байдлыг зориудаар нэмэгдүүлэх замаар дотоод улс төрийн нөхцөл байдалд нөлөөлөхийг зорьсон байж болзошгүй гэж үзжээ.

Мөн прокурорын талаас гаргасан нотолгоонд үндэслэн, дрон илгээх ажиллагаа нь хоёр Солонгосын хил орчмын аюулгүй байдлыг сулруулж, цэргийн нууц мэдээлэл алдагдах нөхцөл бүрдүүлсэн гэж дүгнэсэн байна. Энэ нь бүс нутгийн тогтвортой байдалд сөргөөр нөлөөлсөн хэмээн шүүх онцолжээ. Юн Сок Ёл өмнө нь 2024 оны арванхоёрдугаар сард онц байдал зарлах богино хугацааны оролдлого хийсэнтэй холбоотойгоор улс төрийн хүчтэй маргаан дэгдээж, улмаар албан тушаалаасаа бууж баривчлагдсан юм. Тэр цагаас хойш түүний эсрэг хэд хэдэн хэрэг дараалан шүүхийн шатанд хэлэлцэгдэж байгаа бөгөөд дронтой холбоотой хэрэг нь хамгийн ноцтойд тооцогдож байна.

Шүүхээс оноосон 30 жилийн хорих ял нь улсын аюулгүй байдалд заналхийлсэн үйл ажиллагаанд оролцсон, төрийн эрх мэдлийг зүй бусаар ашигласан гэх үндэслэлтэй холбоотой гэж тайлбарласан байна. Шүүхийн шийдвэрийг зарласны дараа Юн Сок Ёл болон түүний өмгөөлөгч тал давж заалдах боломжтойг мөн дурджээ.

Энэхүү хэрэг нь Өмнөд Солонгосын улс төрийн түүхэнд сүүлийн жилүүдэд гарсан хамгийн дуулиантай шүүх маргаануудын нэг болж байгаа бөгөөд олон нийтийн дунд хүчтэй анхаарал татаж байна. Мөн Хойд Солонгостой харилцах асуудал, үндэсний аюулгүй байдлын бодлогын хүрээнд шинэ маргаан үүсгэж болзошгүй нөхцөл байдал үүсээд байна.

Л.Баяр