АНУ-ын Ерөнхийлөгч Доналд Трамп болон Их Британийн Ерөнхий сайд Кейр Стармер нарын харилцаа сүүлийн өдрүүдэд ил тод зөрчилдөөн болон хурцдав. Трамп өөрийн "Truth Social" хуудсанд Стармерийг огцорно хэмээн мэдэгдэж, Британийн удирдагчийг цагаачлал болон эрчим хүчний бодлогодоо “муу ажилласан” хэмээн шүүмжилжээ.

Трампын мэдэгдэл Лондонд улс төрийн томоохон шуугиан дэгдээсэн байна. Учир нь тухайн үед Стармер өөрөө огцрох тухай албан ёсны мэдэгдэл хийгээгүй байсан бөгөөд АНУ-ын ерөнхийлөгч Их Британийн дотоод улс төрийн асуудлаар ийнхүү урьдчилан мэдэгдсэн нь дипломат хүрээнд ч анхаарал татжээ.

Стармер сүүлийн саруудад өөрийн Хөдөлмөрийн нам доторх хүчтэй дарамттай нүүр тулж байгаа юм. Намын нэр хүнд буурч, орон нутгийн сонгуулиудад муу үр дүн үзүүлсний дараа олон гишүүн түүнийг суудлаа өгөхийг шаардах болсон байна. Түүнчлэн Манчестер хотын дарга асан Энди Бернхэм парламентад сонгогдсоны дараа түүнийг Стармерийн залгамжлагч байж магадгүй гэсэн яриа эрчимжжээ.

CNN-ийн мэдээлснээр, Трамп, Стармер хоёрын харилцаа зөвхөн энэ мэдэгдлээр хязгаарлагдахгүй. Тэд эрчим хүчний бодлого, цагаачлалын асуудал, мөн Их Британи–АНУ-ын зарим аюулгүй байдлын асуудлаар хэд хэдэн удаа санал зөрөлдөж байсан аж. Трамп ялангуяа Хойд тэнгисийн газрын тос, хийн олборлолтыг хязгаарлаж буй Стармерийн бодлогыг удаа дараа шүүмжилж иржээ.

Харин Стармерийн ойрын хүрээнийхэн Трампын мэдэгдлийг зохисгүй хэмээн үзэж байгаа бөгөөд Их Британийн Ерөнхий сайдын ирээдүйн талаар шийдвэрийг зөвхөн Стармер өөрөө болон Хөдөлмөрийн нам гаргана гэж онцолжээ. Гэсэн ч Британийн хэвлэлүүдийн мэдээлж буйгаар Стармер намынхаа дэмжлэгийг ихээхэн алдсан бөгөөд огцрох хувилбарыг үнэхээр хэлэлцэж байгаа аж.

Хэрэв Стармер албан ёсоор огцорвол 2024 онд үнэмлэхүй ялалт байгуулан засгийн эрхэнд гарсан Хөдөлмөрийн нам ердөө хоёр жилийн дараа шинэ удирдагч сонгох шаардлагатай болно. Мөн Их Британи сүүлийн арван жилийн хугацаанд долоо дахь Ерөнхий сайдаа хүлээн авах нөхцөл үүсэх юм.

Л.Баяр