Италийн цагдаагийн шумбагчид зуны аяллын улирал эхлэхийн өмнө Понза арлын ойролцоох далайн агуйд нуусан их хэмжээний хар тамхийг илрүүлэн хураан авчээ. Цагдаагийн мэдээлснээр, далайн гүнд байрлах нууц агуй дотор 40 кг гашиш (hashish) нуусан байсныг илрүүлсэн байна. Энэ нь ойролцоогоор 330 шахмал боодол хар тамхи байсан бөгөөд нийт зах зээлийн үнэ нь хэдэн зуун мянган долларт хүрчээ.
Энэ агуй нь зөвхөн усны доорх нарийн гарцаар нэвтрэх боломжтой, маш нууц байрлалтай байсан бөгөөд цагдаа нар тусгай шумбалтын ажиллагаа явуулж ороод илрүүлсэн байна.
Италийн “Guardia di Finanza” буюу санхүүгийн цагдаа нар энэ бүсийг өмнө нь сэжигтэй хөдөлгөөнтэй гэж ажиглаж байсан бөгөөд олон долоо хоногийн турш тандалт хийжээ. Тэдний үзэж байгаагаар гэмт хэргийн бүлэглэл энэ агуйг ашиглан хар тамхийг зуны амралтын улиралд жуулчдад нийлүүлэх зорилготой нууц агуулах болгож ашиглаж байсан байж магадгүй юм.
Хар тамхийг эх газраас завиар авчирч, Понза арлын Chiaia di Luna орчим дахь агуйд нуусан гэж мөрдөн байцаагчид таамаглаж байна. Италийн эрх баригчид энэ ажиллагааг хүрч очиход маш хүндрэлтэй орчинд ч мэргэжлийн өндөр бэлтгэлтэй ажиллаж чадсаныг харуулсан чухал амжилт гэж онцолжээ.
Л.Баяр
Сэтгэгдэл (2)