Франц улсад зургаадугаар сарын сүүлчээр тохиосон дээд амжилт тогтоосон хэт халалтын оргил үед нас баралтын түвшин огцом нэмэгдэж, 2,025 гаруй хүн илүүтэйгээр нас барсан тухай албаныхан мэдээллээ.

Өмнөх долоо хоногтой харьцуулахад нас баралт 29 хувиар өссөн бөгөөд ялангуяа 45-аас дээш насныхны дунд эрс нэмэгдсэн байна. Зургаадугаар сарын 24-нд тус улсын түүхэн дэх хамгийн халуун өдөр тохиож, Парист агаарын хэм 41 градус хүрснээр нутаг дэвсгэрийнх нь тэн хагаст улаан түвшний түгшүүр зарласан юм. Үүгээр зогсохгүй хэт халалтаас үүдэн усанд живж нас барах тохиолдол эрс нэмэгдэж, 6-р сарын 18-наас хойш 72 хүн амиа алдсан байна.

Энэхүү байгалийн гамшигт үзэгдэл бусад Европын орнуудад ч хүнд хохирол учруулжээ. Бельги улсад хэт халалтын үеэр нас баралт ердийн үеэс 39 хувиар буюу 1,222-оор давж гарсан бөгөөд тэдний тал орчим хувь нь 85-аас дээш насны ахмадууд байжээ. Нидерландад мөн адил агаарын хэм 40 градуст хүрч халсны улмаас 480 орчим хүн нас барсан байна. Коперникийн уур амьсгалын албаны мэдээлснээр, уур амьсгалын өөрчлөлтөөс үүдэн Европ тив дэлхийн дунджаас хоёр дахин хурдан дулаарч байгаа бөгөөд энэ нь зуны хэт халалт, усны хомсдол, ой хээрийн түймрийн эрсдэлийг улам бүр нэмэгдүүлсээр байна.

Харамсалтай нь, цаг уурчдын урьдчилсан мэдээгээр Европ тивд ойрын өдрүүдэд дахин цаг агаарын эрс тэс халалт үргэлжлэх төлөвтэй байна. Францын өмнөд хэсгээр агаарын хэм дахин 40 градус хүрэх төлөвтэй байгаа бөгөөд хуурайшилтын улмаас ой хээрийн түймэр гарах эрсдэл "маш өндөр" байгааг анхааруулжээ. Зун эхэлснээс хойш Францад 7,000 орчим түймэр гарч, 8,700 га талбай шатсан бөгөөд олон мянган иргэдийг нүүлгэн шилжүүлээд байна. Түүнчлэн Португал улс түгшүүрийн байдал зарлаж, Испанид улбар шар түвшний анхааруулга өгөөд байгаа бол, АНУ-д ч мөн адил долоодугаар сарын 4-ний баярын амралтын өдрүүдэд хэт халалт, өндөр чийгшилтэй байгаа нь сая сая иргэдэд хүндрэл учруулсаар байна.

Эх сурвалж: BBC